Rojeva ewroyî ya medyayê ereban; Sûrîye, Hurmuz, Lubnan û Xeza
Medyayê ereban ewro bale ante newera awankerdişê hêzan ê Rojhelatê Mîyanênî, reqabetê mabênê Tirkîya û Îsraîlî yê Sûrîye, zextê ke bi rayîrê Tengawê Hurmuzî Îranî ser o yenê kerdene û ameyoxê sîlehanê Hîzbullah û Hemasî ser.
Tesîrê şerê Amerîka-Îranî, krîzê Hurmuzî, alozîya mabênê Îsraîl û Tirkîya ya Sûrîye û nîqaşê sîlehanê Hîzbullahî û dosyaya Xeza, bîyî rojeva serekîyî. Rojnameyê El Neharî yê Lubnanî dima ke Îsraîlî hêrişê Balafirgehê Ebu Dihurî kerd, analîzêk bi sernameyê "Darbeyê Ebu Dihurî… Îsraîl verê Tirkîya de xeta sure anceno" weşana. Analîz de yeno vatene ke no hêriş, amadebîyayîşê leşkerî yê Tirkîya yê Sûrîye û ahengê neweyî yê herême dir giredayeyo. Rojnameyanê sey El Lîwa, Independent Arabia û El Cezîre zî na babet sey vilabîyayîşê şerê Tirkîya-Îsraîlî şîrove kerd.
Dosyaya Îranî û Tengawê Hurmuzî zî zaf bîyî rojev. Na rey krîz tena sey şerêko leşkerî nê, sey krîzêko aborî û ewlehî yê cihanî ame ercnayene. Rojnameyê El Ehramî yê Misirî qala rayîranê neweyan ê Iraqî kerd ke wazeno petrolê xo bê Hurmuzî teber bikero. Rojnameyê Şerq El Ewsatî zî bi sernameyê "Serekê Amerîka şerêko aborî yo tewr giran vera Îranî da destpêkerdene" xeberêk weşana.
Rojnameyanê El Nehar û El Lîwa têkilîya mabênê Îranî û sîlehanê hetgîranê ey şîrove kerde, El Cimhurîya zî va "Cepheyê Lubnan, Hurmuz û Yemenî serê sêlêka sure de yê."
Heman wext de medyayê ereban bale ante ravêrê dima şerê Xeza, bêçekkerdişê Xeza û îdarekerdişê ci. El Erebîya dîyar kerd ke Îsraîl wazeno ravêrê bêçekkerdişî bido destpêkerdene û nê wextî de sîlehê Hemasî mîyanê peymananê sîyasî de nîqaş benê.
