Rojawan de perwerdeyê kurdkî ame fermîkerdene
Wezaretê Perwerdeyî yê Sûrîya qerar girewt ke kurdkî do mektebanê dewlete û taybet de bêro mûsnayene. Bi nê qerarî yeno plankerdene ke kudkî heme kademeyanê perwerdeyî de bêro cakerdene, hewte de sey 3 dersan bêro wendene û mamosteyê ci bêrê hazirkerdene.
Wezaratê Perwerdeyî yê Hukmatê Demkî yê Sûrîya 27ê tebaxa 2026î de bi qerarê hûmara 493yî, derheqê perwerdeyê kurdkî de serûberkerdişo newe pare kerd.Goreyê nê herêmanê kurdan de ke kurdkî do mektebanê dewlete û taybet de heme kademeyanê perwerdeyî de sey derse bêro wendene.
Kurdkî do pîya bi erebkî û îngîlîzkî hewte de sey 3 dersan bêro dayene û notê ci erjnayîşanê peynîyê demî de bêrê cakerdene. Reyna serra verêne ya perwerdeyî de, wextê prosesê vîyartişî yê wendekaran de do îmkanê ci bibê ke tay dersê zanistê komelî, tarîx, cografya û felsefe kudkî ya zî erebkî bêrê wendene.
Bi qerarî kitabê kurdkî û metaryalê perwerdeyî do bêrê hazirkerdene, mamosteyê ke kurdkî zanê do bêrê wezfedarkerdene û yeno plankerdene ke mamosteyî bi îmtîhanê ziwanî bêrê vîjnayene.
