Rîyad de hêzêko girîng ê eskerîyê Pakîstanî esto

Pêkewtişê mabênê hukmatê Yemenî yê binê paştgirîya Seûdîyan û Hûsîyan dewam kenê. Erebîstanê Seûdî da zanayene ke Tengava Babu’l Mendebî ‘pêmayîşê mîlîsanê Hûsîyan ra pak bîya’. Pakîstano ke yeno vatene Seûdî rê paştgirîya hewayî dano, eşkera kerd ke “Rîyad de nika hûmareka girînge de hêzêko eskerî yê înan esto.” Sefîrê Erebîstanê Seûdî yê Yemenî Muhammed Al Cabirî zî hesabê xo yê medyaya komelkî ra da zanayene ke tengava pak bîya û no seba pêro ereban û yemenijan yew serkewtiş o.

Serekwezîrê Pakîstanî Şahbaz Şerîfî hêrîşê Hûsîyan şermezar kerdî û dîyar kerd ke ê Erebîstanê Seûdî reyde mîyanê paştgirîye de yê. Şerîfî vat: “Goreyê Peymana Pawitişî ya Hemparî ya Meke, girêdayîşê ma yê seba heqê serwerîye û asayîşê Erebîstanê Seûdî bêmabên o.” 

Dîrektorê Pêwendîyanê Komelkî yê Hêzanê Çekdaran Korgeneral Ahmed Şerîf Çavuşrîyî zî derheqê peymana mabênê Tirkîya, Pakîstan û Erebîstanê Seûdî de qisey kerd. Çavuşrîyî vat ke na peymane tenya seba pawitişî ya û mîyara pawitişê hemparî ra, eke welatêk rê hêrîş bibo do zey pêro welatan rê bîyo qebul bibo. Çavuşrîyî îfade kerd ke heta nika kî eskerê înan Seûdî de estbîyî la operasyonî senî benê, no nêyeno eşkerakerdene.

Wezîrê Karanê Teberî yê Tirkîya Hakan Fîdanî zî waşt bale bianco cewherê peymane ser û vat: “Na yew peymana hêrîşî nîya; Tirkîya eskeran nêrışena welatêkê bînî ke uca de hêrîş bikera.” 

Verfekê Wezaretîya Karanê Teberî yê Pakîstanî Sajjad Haydar Hanî zî dîyar kerd ke eskerê înan 1982 ra nata uca de yê û vat: “Rîyad de nika hêz û çimeyanê Pakîstanî yê eskerîyan ra hûmareka zaf girînge esta. Îtîfaqê Meke yew rêxistina pawitişî ya.”