Rixmê hêrişanê giranan ê Siûdîyan zî Hûsîyî aver şinê
Vakurê Yemenî de, mabênê hêzanê hukumatî yê ke hetê Erebîstanê Siûdî ra yenê paştdayene û Hûsîyanê ke hetê Îranî ra yenê paştdayene de, nêzdîyê sînorê Erebîstanê Siûdî de pêkewtişî giran bîyî.
Wîlayetê El-Cewfî yê vakurê Yemenî de, mabênê hêzanê hukumatî yê ke hetê Erebîstanê Siûdî ra yenê paştdayene û Hûsîyanê ke hetê Îranî ra yenê paştdayene de pêkewtişê giranî qewimîyenê.
Goreyê xebera AFP’î, hêzê hukumatî dormeyê baregehê leşkerîyî yê El-Labanatî de şîyî aver û kontrolê tayê herêman girewt xo dest. Labelê rîyê ci ra ke Hûsîyan giranê serdestan girewtê xo dest, baregeh bi temamî nêame destsernayene. Hûsîyan zî derheqê pêkewtişan de dîmenî vila kerdî.
Hûsîyî Deryayê Sûrî de aver şinê
Şer, dima ke Hûsîyî qeraxê Deryayê Sûrî de şîyî aver, hîna giran bi. Hûsîyan sûka bendergehî ya Moxa (Mokha) girewte xo dest û kontrolê xo yê serê qeraxî û tayê girewan hîra kerd.
Tengava Bab el-Mendebî kewena mabênê Deryayê Sûrî û Korfezê Adenî. Nê rîyî ra na herême seba bazirganîya deryayî ya mîyanneteweyî wayîrê yew muhîmîya stratejîke ya. Rixmê hêrişanê hewayîyan ê Erebîstanê Siûdî zî, averşîyayîşê Hûsîyan bi temamî nêame vindarnayene.
Bi se hezaran kesî ca û warê xo ra bîyî
Yemen de hefteyanê peyênan de pêkewtişî reyna giran bîyî. Rîyê pêkewtişan ra bi seyan kesî weşîya xo kerde vîndî. Goreyê UNHCR’î tewr tay 100 hezar kesî ca û warê xo ra bîyî. Hûsîyî, teberê paytext Sana û herêmanê hîrayan ê vakurî, rojawan de kontrolê Hudeyde zî kenê. Bi nê averşîyayîşê xo yê peyênî yê Deryayê Sûrî, înan cayê xo yê qeraxê rojawanê Yemenî de hîna zaf xurt kerd.
