Rejîmê Îranî yewna çalakgêrêk darde kerd

Goreyê agahîyanê ke rêxistinanê heqanê merdiman yê Îranî pare kerdî, na siba çalakgêrêko bi nameyê Arif Xoşkarî ke wextê serehewanayîşê ‘cinî, cuye, azadîye’ de amebi girewtene, Zîndanê Qizilhesarî yê Kerecî de ame dardekerdene. Goreyê heman agahîyan, wexto ke Arif Xoşkar ame destbiserkerdene, binê îşkenceyê fîzîkî û derûnî de îfadeyê ci ameyî girewtene.

Heto bîn ra ameyo dîyarkerdene ke berpirsîyaranê rejîmî wextê îfadegirewtene de bi desteserkerdiş û destdergîya zayendî ya vera birayê Arifî yê qijî, ci rê gefi werdî. Goreyê heman agahîyan, derfet nêdîyayo Arif Xoşkarî ke yew avûkato xoser bigêro û yew mehkemeya nêheqane de cezaya dardekerdene ey rê ameya birnayene.