Qismêko bîn ê koçberanê Efrînî ver bi warê xo kewtî rayîr
Yew koma bîne ya koçberanê Efrînî yê ke şaristananê Qamişlo, Hesekê û Dêrikî de yê, verê xo da warê xo.
Ewro serê sibayî qismêko bîn ê koçberanê Efrînî, zey dewamê kerwananê ke verê cû verê xo dabî Efrîn, çarçeweya peymana 29ê Çeleyî de ya ke mabênê Hêzanê Sûrîyeya Demokratîke (QSD) û hukmatê demkî yê Sûrîyeyî de ameya kerdene, ver bi Efrînî kewtî rayîr.
Hetkarê Asayîşê Pêroyî yê Wîlayetê Hesekê Sîyamend Efrîn û Endamê Tîma Serekîye ya peymana 29ê Çeleyî Mistefa Ebdê kerwanî reyde bîyî. Mistefa Ebdêyî yew kombîyayîşê çapemenîye de dîyar kerd ke no qisim kerwano peyên ê koçberanê Efrînî yo; raybaz û gamê ke semedê destpêkerdişê ravêrê agêyayîşê koçberanê Serêkanîyê, do dima ra wedaritişê mayînan pêk bêrê.
Ebdêyî da zanayene ke xebatê akerdişê awe yê îstasyonê Elokî dest pê kerdî û destnîşan kerd ke dadwerê Rêveberîya Xosere zî çarçeweya peymana 29ê Çeleyî de şîyî Şam û Wezaretê Edaletî reyde pêvînayîş viraşt. Semedê akerdişê dezgehanê nufusî û pasaportan wexto ameyox de zî xebatê înan est ê.
No kerwan do ewro şan de bireso Efrînî.
