Qerarê wezaretî resê festîwalan zî: Mojnayîşê Rojbashî betal bi
Wezareta Kultur û Turîzmî serra 2024î de geyrayîş û mojnayîşê tîcarî yê fîlmê Rojbashî rê destûr nêdabi, la fîlm nê wextî ra verî festîwalan de bêpere ameyêne mojnayîş.
Şaredarîya Şaristanê Pîlî ya Amedî, bernameyê xo yê sînemaya hewayê akerdeyî ya Amfî Tîyatroyê Sumerparkî de ca da Rojbashî zî. Fîlmê derhêner Ozkan Kuçukî do 13ê Êlulî de bêpere bîyamêne mojnayîş. La mojnayîş ra çar rojî verî, Midurîya Asayîşî ya Şaristanî yew nuşte şawit şaredarîye û qerarê Wezareta Kulturî yê 2024î vîr vîst.
Nuşteyê asayîşî de ame vatene ke, qerarê Wezaretî yo ke "mojnayîşê tîcarî" nêerêzneno, merîyet de yo û ame waştene ke şaredarîye reyna ewnîyêro nê mojnayîşî ra. Eke nuşte de yew qedexeyo akerde çin bi zî, şaredarîye fîlm bername ra vet.
Goreyê xebere ke Bîanet de bi îmzaya Nalîn Oztekin weşanîyaya, derhêner Ozkan Kuçuk vano nê qerarî mojnayîşê bêpereyî zî fîîlen asteng kerdî. Kuçukî vat, fîlm verî Stenbol û Amed de amebi mojnayîş. La wexto ke nuşteyê asayîşî ame, dîyar bi ke eke mojnayîş dewam bikero, do netîceyê huqûqîyî bivejîyê.
Qerarê wezaretî dîya mehkeme
Ravêrê huqûqî yê Rojbashî 2024 de dest pêkerd. Ekîbê fîlmî, meha gulane de destûrê wezaretî waşt la wezaretî qebul nêkerd. Dima mehkemeya Enqere qerarê wezaretî betal kerd û vat vera huqûqî yo. La Mehkemeya Îdareyî ya Mintaqa qerarê mehkemeya verêne darde kerd, qerarê wezaretî raşt vîna. Mesele nika Daniştay de ya.
Qedexeyê vizêrî û ewroyî
Rojbash, hîkayeya kaykeranê tîyatroyî yê kurdan a ke 30 serrî verî yew kay kay kerdo û seba reyna kaykerdişî yenê têhet. Fîlmo ke qedexe û zextanê verênan ser o yo, bi xo rastê qedexeyî yeno, no derhênerî rê yew nakokîyo pîl o. Küçük vano, dewrê aştîye û demokratîkbîyayîşî de, ganî nê qerarî reyna bêrê ercnayîş. Mojnayîşê fîlmî yo ke 13ê Êlulî de ameyêne plankerdene, dima ra betal bi.
