Qerarê sansûrkerdişê "Pirtukakurdi" yê Trendyolî rojevê Meclîsî de yo

Padayîşê dikanê sanalî yê bi nameyê "Pirtukakurdi" (Mirza Kitap Hobi) yo ke binê banê platformê e-tîcaretî Trendyolî de kitabanê kurdkî û berhemanê derheqê kulturê kurdan roşeno, ameyo kiriştişê rojevê Meclîsê Pîlî yê Neteweya Tirkîya (TBMM). Wekîla DEM Partîya Amedî Ceylan Akça Cupolo, bi behaneya ke dikane rîyê îfadeyanê zey "Kurd" û "Kurdîstan"î ra ameya astengkerdiş, seba ke Wezîrê Tîcaretî Omer Bolat cewab bido, yew persname da.

Goreyê malumatanê ke ameyê girewtiş; dikana ke aîdê Şîrketê Lîmîtedî yê Tîcaret û Sanayî yê Vileyayîş, Weşanayîş û Çapkerdişî yê Mirzayî ya û Trendyol de fealîyet kena, 14ê Hezîrana 2026î de resayîşê ci ameyo padayîş. Îdareyê platformî, sey behaneyê qerarê padayîşî, pîya bi 48 puananê îxlalî yê ke dikan rê ameyê nuştiş, "Rotişê Berhemanê Nêorîjînalan" (berhemê sexteyî) mojna.

‘Ma 5 serran de yew gerrayê berhemê sexteyî zî nêgirewt’

Wayîrê şîrketî Bawer Berşevî eşkerdayîşê xo yê derheqê ravêrî de da zanayîş ke dikane panc serrî yo eynî kitaban platformî ser o resnena wendoxan. Berşevî bale ante ser girewtişê hezaran ercnayîşanê berheman zî, heta ewro yew muşterî ra zî gerrayê berhemê korsanî yan zî sexteyî nêameyo û îfade kerd ke nê cezayê ke ameyê tetbîqkerdiş raştîye nêmojnenê ra.

Îdîaya sansurî Wezîr Bolatî ra amî persayîş

Yeno îdîakerdiş ke peyê perdeyê qerarê padayîşî de behaneya "berhemê sexteyî" ra zêdêr tetbîqêkê sansurî est o. Goreyê îdîayan, îdareyê Trendyolî weşanê kurdkî yê ke dikan de yenê rotiş û bi taybetî berhemê ke nameyê înan de îfadeyê “Kurd”, “Kurdîstan” û “tarîxê Kurdan” estê kerdê hedef û qerarê astengkerdişî girewt.

Nê vurîyayîşî kewtî rojemê sîyasetî zî. Wekîla DEM Partî ya Amedî Ceylan Akça Cupolo, na polîtîkaya sansurî ya ke yeno îdîakerdiş platformî tetbîq kerda û padayîşê dikanî yê bêheqî kiriştî meclîs û bi armancê roşnîkerdişê babete yew persnameyo resmî da Wezîrê Tîcaretî Omer Bolatî.