Qerarê ‘buroyê terorî’ yê Wezaretê Edaletî: DEM Partîyî bertekê xo mojna
Wekîlê Partiya DEMî Serhat Erenî, qerarê Wezaretê Edaletî yê awankerdişê “buroyê tehqîqatê terorî yê taybetî” ard rojevê Meclîsî.
Wezaretê Edaletî qerar dabi ke bi amancê “tehqîqatê hîna aktîfî” heme 81 şaristanan de, binê siwana 175 serdozgerîyan de “Buroyê Tehqîqatî yê Sûcanê Terorî” yê xoserî bêrê ronayene.
Goreyê xebera Evrenselî, Wekîlê DEM Partî yê Amedî Serhat Erenî derheqê babete de persnameyêk da. Erenî vat ke her çiqas îdîa beno ke amanc tehqîqatê lezabez û standartî zî, la rîyê herayî û nêdîyarîya pênaseya “teror”î ra xebatê demokratîkî zî yenê ercnayene û no rîskanê cîddî yê îhlalê heqan dano awankerdene.
Serhat Erenî da zanayene ke dezgehê mîyanneteweyî yê zey Parlamentoyê Ewropa û Komîsyonê Venedîkî reyan vato ke tetbîqkerdişê “zaf hera” yê mewzuatê “teror”î yê Tirkîya, azadîya îfade û sîyasetê demokratîkî ser o tesîrêko xirab keno. Erenî dîyar kerd ke Komîserê Heqanê Merdiman ê Konseya Ewropa Michael O’Flahertyî zî vato, bikarardişê nê qanûnî serê pawitoxanê heqan û sîyasetmedaran de, munaqeşeyanê gelemperî asteng keno. Reyna ame vatene ke beraatê ke peynîya de dîyenê nêşkenê bibê temînat, ganî tewr sere ra verê nê tehqîqatan bêro girewtene.
Erenî nê persî Wezîrê Edaletî Akin Gurlekî ra persayî:
-81 şaristanan de bi kamcîn îhtîyacî “buroyê tehqîqatê terorî yê taybetî” yenê ronayene?
-Bêyî ke mewzuatê “teror”î teng bibo û “şîdet” bibo krîtero şênber; amancê şima esto ke pê nê buroyan zextê darazî (qanûnî) zêde bikerê?
-Seba ke çalakîyê ke mîyanê azadîya îfadeyî de manenê nêrê krîmînalîzekerdene, do dozgeranê nê buroyan rê perwerdeyêko taybet bêro dayene?
-Kombîyayîşê aşmaneyî yê dozgeran bi asayîşî reyde, nêbeno sebebê binpêkerdişê xoserîya darazî?
-Sey “propagandaya terorî” ercnayîşê pawitoxanê heqan, bi tehqîqatanê bêheqan nêbeno sebebê tacîzê darazî?
-Herinda hem-ahengkerdişê mewzuatî bi AÎHM’î reyde, na gama ke tehqîqatan hîna hera kena, do huqûqê mîyanneteweyî de senî bêro ercnayene?
