Programê Partîya Yenî weşanîya: Perwerdeyê bi ziwanê dayîke rê ca çin o
Programê Partîya Yenî eşkera bi, program de qandê meseleya kurdan çareserîyêka demokratîke, têduştîye û adîlane ameya dîyarkerdene. Ameyo vatene ke do heqê musayîş, xebitnayîş û averberdişê ziwanê dayîke bêro dayene. Labelê, tewr zêde dîqet anceno ke "perwerdeyê bi ziwanê dayîke" rê qet ca nêdîyayo.
91 wekîlê ke partîya CHP ra cîya bîyî, bi serekîya Ozgur Ozelî "Partîya Yenî" naye ro. Programê nê partîyo bi sernameyê "Qandê Ameyoxêko Muşterek " weşanîya. No programo ke zafêrî maneno programê CHP, panc beşan ra yeno pê. Xalê avzelî û muhîmî yê programî wina yenê verê ma:
Partîye eşkera kerdo ke felsefeya ronayîşî ya Komare û îdealê Mustafa Kemal Ataturkî bingehê înan î. Partîye "Şeş Tîrî" (Altı Ok) û nirxê sosyaldemokrasîya moderne sey rayberê sîyasetê xo qebul kena. Armanco serek û tewr muhîm, agêrayîşê sîstemê parlamenterî yo. Meclîs do xurtêr bo û hukmat do verê meclîsî de berpirsîyar bo. Makamê serekkomarîye do reyna bêhet û sembolîk bo.
Pergalê qeyûmî do bêrê qedînayene
Seba şaredarîyan û îdareyanê herêmîyan, program de ameyo vatene ke "Şerta Xoserîya Îdareyanê Herêmîyan ya Ewropa" do bi temamî bêra tetbîqkerdene. Xala tewr balkêşe zî na ya ke; bê qerarê mehkeme yê qetîyî, qet yew îdarekarê weçînîteyî nêno wezîfeden girewtene û tewirê qeyûman do bi temamî bêro qedînayene.
Meseleya kurdan û ziwanê dayîke
Program de qandê meseleya kurdan çareserîyêka demokratîke, têduştîye û adîlane ameya dîyarkerdene. Ameyo vatene ke do heqê musayîş, xebitnayîş û averberdişê ziwanê dayîke bêro dayene. Labelê, tewr zêde dîqet anceno ke "perwerdeyê bi ziwanê dayîke" rê qet ca nêdîyayo.
Seba elewîyan zî, statuyê îbadetxaneyî do bi hewayêko qanûnî bidîyo cemxaneyan. Otela Madimakî zî do biba "muzeyê şermî" ke hafizaya komelî xurt bikero.
Ekonomî û Peymana Stenbolî
Têkilîya dewlete û ekonomîye do reyna bêra rastkerdene; ekonomîyêka plankerdişte, dîjîtal û kesk do bêra ronayene. Xoserîya Bankaya Merkezî do bêra pawitene û modelê hemkarîya komel-taybetî yê ke zirar danê komelî do bêrê caverdayene.
Tirkîya do reyna biba terefê Peymana Stenbolî û qandê pawitişê cinîyan qanûnê mîyanneteweyî do bi temamî bêrê tetbîqkerdene. Mekanîzmayê pawitişê cinîyan do 7/24 xizmet bidê û cinîyî sîyaset de bi hawayêko eştî bêrê temsîlkerdene.
Sîyasetê teberî
Sîyasetê teberî de prensîbê Ataturkî "Welat de aştî, Dinya de aştî" weş ameyo pawitene. Ravêrê endamîya Yewîya Ewropa (AB) do bêro lezkerdene, peymana gumrukî do bêra rojanekerdene û rolê Tirkîya yê mîyanê NATO, AGÎT û Konseya Ewropa de do bêro xurtkerdene. Pêro têkilîyê teberî do ser esasê aştî û hemkarîye bêrê viraştene.
