Platformê Dezgehanê Demokratîkan: Bi zûr û manîpulasyonan şima nêeşkayî heqîqetî çewt bikerê, şima nêeşkenê!

Platformê Dezgehanê Demokratîkan bi sernameyê "Rayapêroyîye rê" yew eşkerayîya nuştekîye weşanaye. Eşkerayîye de ame vatene ke hêrişê ke wazenê têgêrayîşê azadîye yê kurdan û Ravêrê Aştîye û Komelê Demokratîkî bêqîymet bikerê, perçeyêkê polîtîkayanê şerê taybetî yê. Platformî da zanayene ke êyê ke wazenê bîyîşê Rayberê Şarê Kurdî Abdullah Ocalanî yê aştî û azadîye bişiknê û têkoşînê ey yê bi rûmetî reş bikerê, do qetî ser nêkewê û pratîkê înan awî ser o ameyo nuştene.

Tecrîd û qirkerdiş dewam keno

Eşkerayîye de ame vîrvistene ke têkoşîno ke bi serran o dîyeno, mîras û serkewtişêko gird o. Ame dîyarkerdene ke ewro mîyanê yew dewrê krîtîkî de yê ke şîdet, tecrîd û qirkerdiş dewam keno. Hêrişê ke wazenê paradîgmaya azadîya cinîyan bêqîymet bikerê, do nêresê amancê xo. Platformî qedexekerdene û hêrişê vera Tevgera Jinên Azad (TJA) zî şermezar kerdî û vat:

"Nê hêrişî çirpinişê lêminî yê ê kes û derdoran ê ke paradîgmaya ma ya azadîya cinîyan zaf hol fam kenê. Îtîfaqo camêrd û serdest wazeno îradeyê cinîyan bişikno, la no stûn nêşikîyeno. Eke no stûn bişikîyo êyê ke şer û serdestîya camêrdan de israr kenê, do ser bikewê. Hêrişê ke vera destkewteyanê herêmî û pêroyîyan ê şarê kurdî yenê kerdene, wazenê rojevî bidê bedilnayene."

Platformî eşkerayîya xo wina dewam kerde: "Armancê nê hêrişanê sîstematîkan o yo ke îradeyê şarê ma bişiknê, pîyabîyayîşê ma yê rêxistinî lawaz bikerê, ma ra têkoşînê aştî û azadîye vira bidê û Rayber Abdullah Ocalanî tecrîd bikerê. Coka armancê înan tek bi tek kesî nîyê, armancê înan têkoşînê azadîya kurdan û paradîgmaya ci yo. Verpers û tewirê ma zî do îdeolojîk bo. Îdeolojîya ma azadî ya. Ma qet îdeolojî û azadîya xo ra fek vera nêda û ma do nêdê."

'Êyê ke tarîtîye xo rê kenê rayîr do vîn bibê’

Peynîya eşkerayîye de ame vatene ke vera şerê taybetî û zîhnîyetê tekno-faşîstî de verpersê înan o tewr pîl do israrê azadîye, qerardarîya xoverdayîşî û zelalîya rêxistinîye bo. Platformî veng da pêro şarî û embazanê xo yê têkoşînî ke wayîrê Ravêrê Aştîye û Komelê Demokratîkî bivejîyê. Platformî eşkerayîya xo wina peynî kerde: "Heta ewro ma bi keda şarê xo û embazanê xo yê têkoşînî vera heme hêrişan de xo ver da, ma do ewro zî bi eynî ruhî cewab bidê. Êyê ke vera têkoşînê ma de yê, eşkenê tenya bibê sanik û şahidê têkoşînê ma. Ma do bi têkoşînê xo yê huqûqî û rêxistinîyî, nê îtîfaqanê qirêjan teşhîr bikerê. Êyê ke tarîtîye xo rê kenê rayîr, roşnîya têkoşînê ma yê azadîye de do vîn bibê."