Pezeşkiyanî, pêvînayîşê Trumpî red kerd

Serekkomarê Îranî Mesud Pezeşkiyan, seba beşdarbîyayîşê Heyetê Pêroyî yê Neteweyanê Yewbîyayeyan (NY) New York de yo û uca de pêvînayîşê Serekê DYA Donald Trumpî red kerd. Weşanê CBS Newsî de persê "Gelo şima seba pêvînayîşê Trumpî amade yê?" rê verpers da û vat: "Heta ke ê çîyanê ke her roje ma rê ferz kenê înan rê dewam bikerê, bawerkerdişê înan zor o."

Pezeşkiyanî vat: "Nê wexto ke mabênê her di welatan de qet bawerî çin a de, rastrast (rîbirî) Trumpî dir pêvînayîşkerdiş zor o." 

Pezeşkiyanî da zanayene ke DYA her roje Îranî tehdît kena û wina vat: "Her roje ambargo serê ma zêde kenê. Her roje ma tehdît kenê. Her roje ma rê hêriş kenê. Û çîyê ke nusenê, êyê ke danê kaxizî ser, pabendê înan nêbenê (înan nêanê ca). Yanî eke bikewê pêvînayîşan, gelo bi raştî çîyê ke ser o ameyê pê, do înan bîyarê ca?"

Derheqê planê 7 rojan o ke Wezîrê Karanê Teberî yê Îranî Abbas Arakçîyî seba akerdişê Tengava Hurmuzî bi rayîrê mîyanberan pêşkêşê DYA kerdibi de zî Pezeşkiyanî vat: "Eke no mesaj bireso serekê DYA yan zî kesê ke rayberîya pêvînayîşan kenê û beşdarê munaqeşeyan benê; raşt a ke wexto ke no teklîf qebul kerd, ê rojî ra dima no ravêr do asayî dest pêbikero."

Derheqê dosyayê nukleerî de zî Pezeşkiyanî ard ziwan ke welatê ey qet nêwazeno yew çeka nukleere viraşo û do destûr bidê mufetîşanê Ajansê Enerjîya Atomî yê Mîyanneteweyî ke bikewê welatî.

Trum do weçînayîşan ra dima Îranî bombavaran bikero

Ame îdîakerdene ke Serekê DYA Donald Trumpî zî teklîfê Îranî yo 7 rojan red kerdo. Rojnameyê Wall Street Journalî bi sipartişê xebere rayadaranê DYA nuşt ke Trumpî hetkaranê xo rê vato o do weçînayîşanê mîyanênan ê aşma Teşrîna Peyêne ra dima, reyna dest pêbikero ke Îranî bombavaran bikero. Ame dîyarkerdene ke Trumpî pêvînayîşanê peyê beranê girewteyan de vato ke wexto ke mesele bena Tahran, problema bawerîye esta.