Pervîn Buldane: Ma eşkenê aşma Teşrîna Verêne de gamêka şênbere bibînê
Endama Heyetê Îmrali yê DEM Partîye Pervîn Buldane derheqê merhaleyê ravêrî de ercnayîşî kerdî û vat: “Têkilîya raşteraşt û vîrnêrayîşê beşanê cîya-cîyayan do verhukman kêm bikero û meşrûyetê komelkî yê ravêrî bihêz bikero. Ma eşkenê aşma Teşrîna Verêne de nê babî de averşîyayîşêko şênber bibînê.”
Ravêrê Aştîye û Komelê Demokratîkî yo ke 27ê Sibata 2025î de bi vengdayîşê Rayberê Şarê Kurdî Abdullah Ocalanî dest pêkerd, nika serra xo ya diyîne keno pûr. Dima ke Qanûnê Çarçeweyî, Meclîs de ameye qebûlkerdene, pawîyeno ke gamê pratîkî bêrê eştene. Endama Heyetê Îmrali yê Partîya DEMî Pervîn Buldane derheqê dîdarê xo yê peyênî yê bi Rayberê Şarê Kurdî Abdullah Ocalanî, rewşa Rojhelatê Mîyanênî û Heyetê Bêsîlehkerdiş û Sîyasîbîyayîşî de cewab da persanê Ajansê Mezopotamyayî.
Pervîn Buldane vat ke pêvînayîşê peyênî de Birêz Ocalanî bale ant merhaleyêka krîtîke ser û wina vat: “Seba averşîyayîşê ravêrî ganî her kes înîsîyatîf bigêro û ferasetê sîyasîyî bimojno. Ravêro ke ma tede yê, eke bêproblem derbaz bibo, ma do derbazê merhaleya aştîya pozîtîfe bibê. Yanî ma nika qismê sîlehî yê meselaya se serre nê, qismê sîyasîyî do munaqeşe bikerê û gamê nê qismî do bêrê eştene. Coka no ravêr tarîxî yo. Barış, bi qasî ke kesê ke cîya fikirîyenê eşkenê eynî mase ser o bêrê têhet, hîna bihêz beno.”
Derheqê alozîya Rojhelatê Mîyanênî de zî Buldane dîyar kerd ke Birêz Ocalan herême sey “bermîlê barûtî” name keno. Buldane vat, “Birêz Ocalan vano ke seba pawitişê şaranê Rojhelatê Mîyanênî, şarê kurdî û Tirkîya rayîro tewr bingehên aştîye û demokrasî ye. Ganî ma vera provokasyonan hîşyar bê.”
Buldane qiseykerdişê xo de qala Heyetê Bêsîlehkerdiş û Sîyasîbîyayîşî zî kerd û dîyar kerd ke do Birêz Ocalan koordinatorîya nê heyetî bikero: “Ocalan nê ravêrî de wazeno komelê cîya-cîyayî reyde pêvînayîşan bikero. Ganî şert û mercê xebate û têkilîyanê azadan bêrê ronayene. Ma pawenê ke nê heyetî aşma Teşrîna Verêne de dest bi xebatanê xo bikero. Ocalan hetan rê metodê daranceyî pêşnîyaz keno. Yanî bi gamanê qican la bawerîdaran û bi yewbînan temamkerdiş, berzêr şîyayîşî pêşnîyaz keno.”
Seba pêvînayîşanê rojnamegeran, nuştoxan û temsîlkaranê STK’yan zî Buldane wina qedêna: “Ganî aşma Teşrîna Verêne de nê pêvînayîşî dest pêbikerê û pê garantîyê huqûqîyî bêrê domnayene. Rojênê verê ma de ma eşkenê gamêka şênbere bivînê. Na yewe nê tenya seba ravêrî, seba meşrûkerdişê dîyalogê komelkî zî zaf girîng a û do verhukman bişikno.”
