Parlamentero fransayij Saint-Martin: Ez wazena Abdullah Ocalanî reyde têkilîyêka rasterast rona
Wekîlo fransayij Arnaud Saint-Martinî dîyar kerd ke Rayber Apo aktorêko esasî yê Prosesê Haştî û Komelê Demokratîkî yo û seba pêdîyayîşêko rî bi rî muracatêko fermî kerd.
Wekîlê Meclîsê Neteweyî yê Fransa yê partîya La France Insoumise (LFI) û sosyolog Arnaud Saint-Martin do 17-19ê êlûla 2026î de şêro Tirkîya. Verê nê seferî ey seba pêdîyayîşê Rayber Apoyî yê Îmrali muracatêko fermî kerd; no muracat Wezaretê Karanê Teberî, Wezaretê Edaletî û Mudurîya Pêroyî ya Hepisxaneyan rê ame şawitene. Saint-Martinî muracatî de dîyar kerd ke Rayber Apo derheqê meseleya kurdan û prosesî de muxatabanê serekeyan ra yew o, ganî bieşko zîyaretkeran qebul bikero û dinyaya tebere reyde têkilî rono.
Saint-Martinî ard ziwan ke o Rayber Apoyî hetê entelektuelî ra şinasneno: "Ez sosyolog û cigêrayox a, verê mi edîtorîye kerda. Kitabê Ocalanî 'Sosyolojîya Azadîye' ke Éditions du Croquantî weşanabî, mi amade kerd. Yanî ez merdimêkî reyde rî bi rî ya ke sîyaset ser o fikirîyeno û no zî hucreya xo de."
Derheqê prosesî de Saint-Martinî vat ke merhelayêka nedîyare de yê: "Rayîrêko dihetî aseno. Hetêk ra îqtîdar akerdişêk mojneno û ver bi muzakere de pozîtîf o, la şertê muzakeran zelal nîyê. Hetê bînî ra pêlê tepiştişan ke rayberê DEM'î zî tede yê, dewam kenê. Ma mabênê nê her di raştîyan de mendî."
Wekîlê fransayijî îfade kerd ke komelê Tirkîya hîna zî binê tedayêka girane de yo: "Merdim bajarêêkê sey Îstanbulî de zere ra azad aseno, la eynî wext de merdim bi hewayêko giran teda hîs keno. Merdimî nê îhtîmalî reyde rî bi rî yê ke rojêk seba çekuyêke bêrê tepiştene." Ey bale ante enflasyon û zehmetîya cuye ser o zî û vat ke welat sey welatêkê binê fanûsî yo, rejîm bi cehdê kontrolkerdişê şarî xo xebitêno. "Demokrasî de raqîbê sîyasî nêyenê hepiskerdene."
Saint-Martinî derheqê berpirsîyarîya mîyanneteweyî de vat: "Ez wekîlêko çepgir a. Ma sey çepgirîya averşîyaye û radîkale bi seypêyîya şênbere û rêzgirewtişê heme heqanê merdiman ra girêdaye yê. Ma do vera nê pêlê tepiştişan de eşkerayîyan bidê." Ey îfade kerd ke têkilîyê ke ronayê, seba her di welatan zî xeberdarê ameyoxêkê bînî yê.
Derheqê xurtbîyayîşê rastgirîya tûje ya Ewropa de Saint-Martinî vat ke serkewtişê AfD'yî Almanya de alarm o û no îdeolojîyêko neo-nazî yo. Ey dîyar kerd ke seba weçînayîşê serekkomarîye yê 2027î hedefê înan tena xoverdayîş nîyo, seba ke çepgirîyêka radîkale bêro îqtîdarî zî yo: "Eke La France Insoumise û Yewîya Şarî bi namzedîya Jean-Luc Mélenchonî ser bikewo, no do heta Tirkîya mesajêko xurt bişawo, serkewtişê nê olîgarşîyan neçar nîyo."
