Parlak: Ganî ravêr bi gamanê pêtan û verayewbînan bêro averberdene
Wekîlê DEM Partî Vezîr Coşkun Parlakî vat ke seba averşîyayîşê ravêrî ganî şertê Rayberê Şarê Kurdî Abdullah Ocalanî bêrê bedilnayene û gamê pêtî yê verayewbînan bêrê eştene.
Ravêro ke bi vengdayîşê Rayberê Şarê Kurdî Abdullah Ocalanî yê 27ê sibate yê Aştîye û Komelê Demokratîkî kirişîya merhaleya newî, serra diyîne rê nîzdî beno. Bado ke qanûnê çarçewa meclîs de ame qebulkerdene, gamê pratîkî yenê pawitene.
Wekîlê DEM Partî yê Colemêrgî Vezîr Coşkun Parlakî derheqê ravêrî de ajansê ANF’î rê qisey kerd.
Parlakî îfade kerd ke badê qebulkerdişê qanûnê çarçewa ganî Heyetê Emnîyetê Millîyî (MGK) ravêrî erey mefîno û berpirsîyarîya xo bîyaro ca û vat ke meseleya kurdan ganî têna binê sernameyê emnîyetî de nêro destgirewtene, ganî zemînê huqûqî û sîyasî de têrîameyîş bêro kerdene.
Parlakî ard ziwan ke heyeto ke binê serbanê serekkomarîye de ame pêardene seba zemînê qanûnî û huqûqî de averşîyayîşê ravêrî muhîm o û vat ganî Rayberê Şarê Kurdî Abdullah Ocalanî muxatab bêro girewtene, statuyê ci yê muzakerwanê serekî bêro naskerdene. Parlakî vat ke seba averşîyayîşê ravêrî gamê pêtî yê verayewbînan bêrê eştene.
Parlakî ard ziwan ke ganî şertê Rayberê Şarê Kurdî Abdullah Ocalanî bêrê bedilnayene û hetê cîya cîyayî bieşkê Rayberê Şarê Kurdî Abdullah Ocalanî reyde pêvînayîş bikerê û veng da ke tepişteyê sîyasîyî û kesê ke rîyê sebebanê sîyasîyan ra teberê welatî de yê wa şertê înan bêrê caardene ke tewrê sîyasetê demokratîkî bibê.
Parlakî îfade kerd ke badê pêardişê warê emnîyetî ganî serûberdişê demokratîkbîyayîş û qanûnî bêrê caakerdene ke hemwelatîya seypêyî ya kurdan bêro caardene.
