Paketê Darazî yo 13. rayîr de yo
Wezîrîya Edaletî û gruba AKP’yî ser o xebetîyenê ke Paketê Darazî yo 13. aşma Teşrîna Verêne de bîyarê Meclîs. Hadrekerdişê nê paketî de tesdîqkerdişê nasnameyê medyayê komelkî, lezkerdişê dewayanê ciyabîyayîşî û qeydeyê neweyî yê nafaqayî vejîyenê vernî.
Çarçewaya Paketê Darazî yo 13. hema bi temamî nêbîya eşkera. Wezîrê Edaletî Akın Gurlekî 18ê Êlule de Edlîyeyê Edene de dadger û dozgeran reyde pêvînayîşêk kerd û da zanayene ke paket aşma Teşrîna Verêne de yeno Meclîs. Goreyê zanayîşanê çapemenîye, seba ke karberê medyayê komelkî bi nasnameyê xo yê raştikênî hesab akerê, serê e-Devletî ra sîstemêkê tesdîqkerdişê nasnameyî ser o xebate yena kerdene. Pê nê qerarî amanc beno ke medyayê komelkî ser o sûcên zey qaçaxkarîya behîsî, madeyê hişberî û fuhuşî ra ver bêro girewtene.
Dewayanê ciyabîyayîşî
Babêka bîn a ke paket de ca gêna, dewayê ciyabîyayîşî yê. Wezîr Gurlekî dabi zanayene ke seba nê dewayî derg nêbê vurnayîşî yenê hadrekerdene. Eke dadger qenaet bîyaro ke zewec nêno domnayene, qerarê ciyabîyayîşî eşkeno netîceyanê huqûqîyan yê zey nafaqa û welayetî ra abirîyo. Reyna nirxnayîşê qusuro giran zî rojdem de yo û yeno wîştene ke tayê dewayî wextêko kilmêr de biqedîyê.
Seba nafaqayî modelo newe
Nafaqa zî warê paketî de yew babet a. Qerarê betalkerdişî yê Mehkemeya Qanûnê Bingeyî (AYM) yê seba nafaqaya bêdemî ra dima, vurnayîşê qanûnî yê hewceyî do nê paketî de ca bigêrê. Dadger do şertanê ekonomîk û komelkî yê terefan û rewşa qusurî bîyaro vîrî û wextê nafaqayî qerar bikero; tayê rewşan de nafaqaya bêdemî zî do bêra nirxnayene. AYM, Hezîrana 2026î de maddeya 175. yê Qanûnê Medenî ra îbareya "bêdemî" betal kerdebi.
Yeno pawitene ke çarçewaya Paketê Darazî pê teklîfê qanûnî yê Meclîsî eşkera bo. Paketê Darazî yo 12., 31ê Temmuza 2026î de weşanîyabi û kewtbi rewac.
