Ozgur Ozelî waştişnameyê ronayîşî yê ‘Partîya Newîye’ îmza kerd
Ozgur Ozelî CHP ra îstîfa kerd û waştişnameyê ronayîşî yê partîya newîye ya ke do bêro ronayene, îmza kerd.
Dewaya ke derheqê Kurultayê 38. yê Asayî yê Partîya Şarî ya Komare (CHP) yo ke tarîxanê 4-5ê Teşrîna Peyêne ya 2023yî de ameyo viraştene de amebî akerdene, 21ê Gulane de qerarê “betalbîyayîşo qatî”î dîya. Nê qerarî ra dima baskê Ozgur Ozelî xebatanê partîya newîye rê dest pêkerdbi.
Ozgur Ozelî waştişnameyê ronayîşî yê Partîya Newîye îmza kerde. Ozelî vat, “Welat, şar û partîya ma rê xeyrîn bo.” Pîya bi Ozelî, bi temamî 91 wekîlanê şarî Partîya Şarî ya Komare ra îstîfa kerd û tewrê Heyetê Ronayoxanê Partîya Newîye bîyî.
Ozgur Ozelî profîlê xo yê X’î ra îbareya “Serekê Pêroyî yê CHP'yî” zî wedarite. Fotografê logoyê CHP’yî yê profîlê Ozelî, bi fotografê logoyê “Partîya Newîye” bedilîya.
Logoyê Partîya Newîye eşkera bi
Logoyê Partîya Newîye ya ke gruba Ozgur Ozelî naya ro zî eşkera bi. Îstîfaya wekîlanê şarî ra dima, pawîyeno ke Gul Çîftçî û Murat Emîr waştişnameyê ronayîşî yê Partîya Newîye teslîmê Wezaretê Karanê Zereyî bikerê.
