Osman: Kurdî ganî demê neweyî de têkoşînî bi hawayo sîyasî û dîplomatîk bikerê
Sîyasetmedar Muhsîn Osmanî vat ke ganî kurdî demê neweyî de giranîye bidê têkoşînê sîyasî û dîplomatîkî ser o û bale ante ke seba pawitiş û mendekerdişê destkewteyanê Rojawanî ganî têkoşîn dewam bikero.
Parlamentero verên ê Iraqî û sîyasetmedaro kurd Muhsîn Osmanî averşîyayîşê ke kurdî demê neweyî de înan reyde rî bi rî yê û metodê têkoşînî erjnayî.
Osmanî vat ke Rojawan de bi serran warê perwerde û ziwanî de têkoşînêko muhîm ame ramitene û bîyayîşê kurdkî ziwanê perwerdeyî de destkewteyanê muhîman ê nê têkoşînî ra yew o: "Destkewteyêk ameyo girewtene, la ganî no destkewte bêro mendekerdene. Naskerdişê kurdkî sey 'ziwanê neteweyî' Sûrîyeya newîye de muhîm o, la bi tena bes nîyo; ganî kurdkî sey ziwanê fermî bêro qebulkerdene. Cagirewtişo sînordar ê kurdkî yê mufredatî seba sîstemê perwerdeyî yê Rojawanî munaqeşeyêka newîye vejeno; ganî seba garantîkerdişê destkewteyan têkoşîn dewam bikero û no têkoşîn êdî tena warê perwerdeyî de ney, mîyanê strukturê sîyasî û huqûqî yê Sûrîyeya newîye de zî bêro ramitene."
Osmanî ard ziwan ke averşîyayîşê Rojawanî û prosesê sîyasî yê Tirkîya yewbînan ser o tesîr kenê û ganî kurdî demê neweyî de vera provokasyonan hişyar bê û reyna nêkewê prosesêkê pêkewtişî: "Têkoşînê demê neweyî ganî sîyasî û dîplomatîk bo. Kurdan vîyarte de demanê cîyayan de Amerîka, Yewîya Sowyetan, Fransa, Tirkîya û qewetanê herêmkîyan ê bînan reyde têkilî ronayî; polîtîkayê dewletan goreyê şertan vurîyenê, coka kurdî ganî polîtîkayanê xo goreyê vindertişê qewetanê bînan şekil nêdê. Ganî bêro dîyarkerdene ke kam dost o, kam dişmen o; dîyalog û muzakere zî parçeyê têkoşînî yê."
Osmanî vat ke averşîyayîşê Rojawan, Tirkîya û herêmanê bînan ê kurdan yewbînan ra cîya nêyenê girewtene û strukturê sîyasî yê cîyayî eşkenê bi pawitişê şertanê xo sernameyanê hemparan de hemkarî bikerê: "Ma hemkarî wazenê, ma heqanê xo wazenê." Derheqê Şingalî de ey vat ke ameyoxê herême tena bi sernameyanê leşkerî û asayîşî nêyeno nirxnayene; Şingal seba Îsraîl, Amerîka û qewetanê herêmkîyan zî cayêko muhîm o, la ganî raştîya herême û îradeyê şarê Şingalî bêro esasgirewtene û asayîşê herême, pawitiş, heq û îradeyê şarî yê sîyasî pîya bêrê nirxnayene; strukturê Iraqî yê sîyasî zî nê nirxnayîşî ra cîya nêbeno.
