Orkestraya Ewropa do bi senfonîya mîtolojîya kurdan veng bido
Eserê bestekar Kemal Yildirimî yo bi nameyê “Hişyarî” yo ke vatîşanê mîtolojîkan ê kulturê fekî yê kurdan keno muzîk, 5ê Teşrîna Verêne de hetê Orkestraya Ewropa ya Metropolîtanî ra do bêro îcrakerdiş.
Hîkayeyê mîtolojîkî yê ke kulturê fekî yê kurdan de nesil bi nesil ameyê neqlkerdiş, xebatanê bestekar û muzîsyen Kemal Yildirimî de şiklêko muzîkal o newe gênê. Nêzdîyê 25 serran o Merkezê Kulturî yê Mezopotamya (MKM) de xebitîyeno, Yildirim Destanê Gilgamêşî ra heta Şamîran, Derwêş û Edûlê ra heta Elo Dîno vatîşan ano mîyanê besteyanê xo.
Yildirimî Ajansê Mezopotamya rê qisey kerd û dîyar kerd ke merkezê xebatanê ey de kulturê kurdan bibo zî, o muzîkê dinya û kevneşopîyanê muzîkalan ê cîya-cîyayan ra zî îstîfade keno. Goreyê ey mîtolojî, hîkayeyanê cemedîyayeyan ê vîyarteyî ra vêşêr, yew çimeyo weş o ke vîrê komelan kirêşeno.
Yildirimo ke nêzdîyê des eseran ser o xebitîyeno, dîyar keno ke qismêkê nê eseran seba ke paştgirîya maddîye nêvînîyaya nêeşkayê bêrê weşanayîş. Eserê bi nameyê “Hişyarî” yo ke Yildirim ser o xebitîyeno, 5ê Teşrîna Verêne de hetê Orkestraya Ewropa ya Metropolîtanî ra do bêro îcrakerdiş. Yildirim zî do orkestra reyde bixebitîyo.
