Nurjiyane Ezer kura de ya?
Nurjiyana 22 serreyî 20 rojî verî vîndî bîye. Keyeyê aye murecatê polîsan kerd, la musa ke murecatê înan 18 rojî nêameyo qeydkerdene. Maya aye Gulbahare aqîbetê Gulîstane Doku û Rojîne Kabaiş ardi vîrî û wazena keyneka aye demêkê lezînî de bêro vînayene.
Nurjiyane 5ê Êlule de seba ke şêro kar keye ra vejîyaye û reyna nêagêraye. Keyeyê aye yo ke taxa Yunus Emreyî ya Tarsusê Mersînî de ciwîyêno, 6ê Êlule de şî Qereqolê Polîsan ê Lutfu Camî û murecat kerd. 18 rojî derbaz bîyî la derheqê aqîbetê aye de qet yew xeberêke nêameye girewtene. Keye reyna şî qereqol û uca musa ke îfadeyê înan ê verênî nêameyê qeydkerdene û îxbar 18 rojî dozgerîye rê nêerşawîyayo. Murecatê 22ê Êlule ra dima dosya erşawîyaye dozgerîye.
Demo vîndîbîyaye yo 18 roj ê
Maya aye Gulbahar Ezer qisey kerd û wina vat: “Siba saete 06.30 de şîye kar. Şan saete 19.00 de pismamê xo rê mesaj eşt vat, 'ez do mesayî de bimana, şarjê mi do biqedo.' Ma vat qey mesayî de menda. Şewe heta erey nêameye, ez bîya nerehet. 6ê Êlule saete 13.00 de mi murecat kerd. Polîsan vat ‘telefonê aye esto?’. Mi vat pîya yo, hewce keno cigêyrayîş bikerê. Polîsan vat 'seba cigêyrayîşê telefonî destûrê dozgerîye lazim o' û cigêyrayîş nêkerd.”
Hewtêk dima maye nê rey şîye dozgerîye. 22ê êlule de reyna şîye qereqol û musaye ke belgeyî qet nêerşawîyayê dozgerîye. Werênayîşê qereqolî ra dima îfadeyê maye reyna gêrîya û ancax o wext murecat ame resnayene bi dozgerîye.
‘Ez nêwazena zey Rojîne û Gulîstane biba’
Gulbahar Ezere vat: “Eke mi israr nêkerdêne û înan de nêdabêne pê, belkî hema zî vindertêne. Ez wazena keyneka mi lezabez bêro vînayene. Ez nêwazena zey Rojîne û Gulîstane bibo. Wexto ke îfadeyê mi gêrîya polîsan vat, 'Keyneka to bi xo şîya. Çîyê wina benê. Tayê rojan bipawê.' Ez kura şîya mi xapînayî.”
