Nurîye Gulmene: 2 tepişteyê 60 serreyî 25 rojî yo grevê vêşanîye de yê
Akademîsyena tepişte Nurîye Gulmene bi mektubêka xo da zanayene ke tepişteyê 30 serran Huseyîn Ozarslan û tepişteyê 20 serran Mehmet Akdemîr 25 rojî yo grevê vêşanîye de yê. Gulmene seba nê di tepişteyan veng da rayaumûmîye ke wa bibê vengê înan.
Nurîye Gulmena ke serra 2020î ra nata Hepisxaneyê Qefilnayeyî yê Marmara de tepişte ya, mektubêka xo şirawite Ajansê Mezopotamya (MA) û rewşa zîndanan arde ziwan. Gulmene mektuba xo de bale ante tecrîdê giranî yê hepisxaneyanê "tîpê bîrî" ser û vat ke mîmarîya nê hepisxaneyan xeylê wext o rojev de ya. Gulmene da zanayene ke tepişteyanê şoreşgeran hîrê serrî yo vera nê zîndananê tecrîdî xoverdayîşê vêşanîye kerdo û tepişte Gurkan Turkogluyo ke Hepisxaneyê Tîpê Bîrî yê Antalya de bi, nê xoverdayîşî de bîbi şehîdo verên.
Sozê ke dîyayî ca nêameyî
Gulmene derheqê pêvajoyê mergê Gurkan Turkogluyî de wina vat: "Gurkan û embazanê ci rê soz dîya ke eger ê grevî biqedînê do sevkê înan bêro kerdene. La sozê ke dîyayî ca nêameyî. Avukatan wîşt sevkê înan viraşt la Gurkanî rê bi zor midaxale ame kerdene û bîyîşê ci qefilîya, reyna nêame xo ra. Badê mergê ci sevk ame vindarnayene. Tena di tepişteyê ke grevê vêşanîye de bîyî ameyî vetene. La tepişteyê nêweş û kokimî tîpê bîrî de mendî."
Di çinarî 25 rojî yo vêşan î
Gulmene mektuba xo de bale ante ser ke badê mergê Gurkanî, di çinarî kewtî grevê vêşanîye:
Huseyîn Ozarslan: 65 serreyo û 30 serrî yo zîndan de yo.
Mehmet Akdemîr: 60 serreyo û 20 serrî yo zîndan de yo.
Weşîya înan dest nêdana la ê reyna zî grev de yê. Gulmene vat: "Ma wazenî ke şima bibê vengê nê merdimanê erjîyayeyan ke emrê xo dayo têkoşînê xelisîyayîşê şarî."
