Notê ke bi qelema cinîyan tarîxî de ameyî verdayene, bîyî kitab
Rojaneyê Dewreyan ê Akademîya Cinîyan ê Azadan a Zeynep Kinaci ke hetê Weşanên Meyman ra ame weşanayene, tecrubeyê nêzdîyê 12 serran ê perwerde, cuya hempare û vîrê kolektîfî û têkoşînê azadîya cinîyan bi îzahatê cinîyan qeyd keno.
Eserê ke hetê Weşanên Meyman ra bi piştîya rojnameyê Newaya Jinî ame amadekerdene, rojaneyê dewreyan ê mîyanê 2ê kanûne 2009î û 22ê teşrîna verêne 2021î reya verêne yew cîld de ameyê têhet. Kitab rojaneyanê ke dewreyanê perwerdeyî de hetê wendekaran ra ameyî nuştene, ano pêser.
Rojaneyî tena çimdarîya şexsî ney, cuya hempare, prosesê perwerdeyî, munaqeşeyî, xorexnekerdiş, berhemdayîşo kolektîf û gêrayîşê azadîye yê cinîyan zî nawnenê û belgeyê tarîxî yê.
'Nika seba ma wextê cinîyan o'
Beşê "Herinda Vernuşteyî de" de amancê eserî yeno eşkerakerdene. Wendekaranê akademî rojaneyê xo sey "rêçêka ke tarîxê cinîya azade rê yena verdayene" name kenê û nuştişî sey cehdê awankerdişê vîrêko alternatîf ê vera vatişanê tarîxê serdestan erjnenê. Vernuşteyî de bi vatişê "Nika seba ma wextê cinîyan o" îdîaya cinîyan a newe ra awankerdişê wext û tarîxê xo yena ziwan.
Vîrê mektebêk
Beşê kitabî yo verên, "Gama ke Ma Dest Pêkenê" amancê tepiştişê rojaneyan îzah keno. Nuşteyî de bale yena antene ser o ke seba fehmkerdişê raştikên ê têkoşînê azadîye wendişêko raşt ê tarîxî muhîm o û nuştekîkerdişê tecrubeyanê akademî mîrasêko muhîm ê neslanê ameyoxî yo. Rojaneyanê verênan de prosesê awankerdişê muhîtê perwerdeyî, xebatê hazirîye yê aşman, keda hempare û atmosferê cuye bi teferûatan yenê behskerdene.
Vîrê cinîyan o kolektîf
Nuşteyê ke bi qelema bi desan cinîyanê demanê cîyayan vejîyayî, eserî kenê xebatêka vîrê cinîyan ê kolektîfî. Her dewreyê perwerde ruh, munaqeşe, hêvî û gêrayîşê xo resneno neslanê ameyoxî. Bi nê hetî ra eser çimeyanê xasan ra yew o ke tecrubeyanê perwerdeyî yê têkoşînê azadîya cinîyan xo de hewêneno.
Vateyê cinîyan bîyî parçeyê tarîxê nuştekî
Esero ke resmê qapaxî hetê hunermend Sînan Hezerî ra ame amadekerdene, dewreyanê perwerdeyî yê serranê dergan yew kitab de ano têhet û vateyê ke bi qelema cinîyan vejîyayî, keno parçeyê tarîxê nuştekî. Rojaneyê Dewreyan arşîvêko şahidê vîyarteyî ra teber, sey weşanêko muhîm ke keda xo dano têkoşînê awankerdişê vate, tarîx û vîrê cinîyan, wendoxan reyde yeno têhet.
