Nobeta KESK’î bi çalakîya roniştişî dewam kena

Konfederasyonê Sendîkayanê Kedkaranê Kamuyî (KESK), nobeta ke vizêr bi telebê agêrayîşê karî yê kedkaranê gelemperî yê ke peyê tehlukeyê derbeya 15ê Temuze de bi Qerarnameyê Hukmê Qanûnî (KHK) kar ra ameyê îxrackerdene dabi destpêkerdene, rameno. Vizêr Guvenpark de eşkerakerdişî ra dima KESK’ijanê ke waşt çalakîya roniştişî bidê destpêkerdene, polîsan hêrişê înan kerd û waşt asteng bikê, zaf kesî destbend kerdî.

KESK’ijan vera astengkerdişî de çalakîya xo ya roniştişî berde bînaya KESK’î ya Qizilayî û şewe uca de derbaz kerde. Çalakîya ke heta sibayî ramite de, sloganê "Ma do karê xo apey bigîrê", "Biciwo berxwedana kedkaran", "Kedkarî do AKP ra hesab bipersê" û "Jin, jîyan, azadî" ameyî eştîyene.

Saetanê sibayî de dezgehê komelê demokratîkî û hemwelatijan zîyaretê paştgirîye yê çalakîya ke dewam kena, kerdî. Hemsereka Pêroyî ya KESK’î Ayfer Koçake vat ke nobete bîya xoverdayîş û dîyar kerd ke zey ke verê cû ame dîyarkerdene çalakîya înan do heta saete 15.30 dewam bikero. Dima aktîvîstanê îqlîmî zî zîyaretê nobete kerd û semedê dinîyayêka ke tede qabilê cîwîyayîşî bo mesajê têkoşînê hemparî da.

Dîyarkerdişê têkoşînê hemparî

Hemsereka Rêxistina Enqere ya Partîya Têduştîye û Demokrasî yê Şaran (DEM Partî) Gulbahar Gunduze dîyar kerd ke ser ra 10 serrî derbaz bîyî zî xoverdayîşê kedkaranê gelemperî yê ke karê xo ra ameyê îxrackerdene dewam keno. 

Gulbahar Gunduze, ard ziwan ke têkoşînê têduştîye û azadîye yê şarê kurdî û têkoşînê demokrasîyî yê Tirkîya yewbînan ra cîya nîyê û wina vat: "Bêhuqûqîya ke verê xo dana yew kesîmî, erey yan zî rew hemeyê komelî gêna binê hedefê xo. Na semed ra ma telebê edaletî yê KHK’ijan zey perçeyêkê têkoşînê xo dîyê; her zemîno ke ma dîyê de ma ard ziwan û bîyî teqîbkarê ci. Nê ra dima zî ma do dewam bikê ke bibê teqîbkar."

Qiseykerdişan ra dima nobete, bi çalakîya roniştişî dewam kena.