Newaya Jinî bi sernameyê ‘Îradeyê çareserkerdişê perseya se serran rîbirîameyîş o" vejîya

Rojnameyê Newaya Jinî hûmara xo ya Tebaxe bi sernameyê "Îradeyê çareserkerdişê perseya se serran rîbirîameyîş o" resnaye wendoxanê xo. Na hûmare de tewir bi tewir dosya estê; dosyeyanê muhîman ra yew, mana tarîxî û sîyasî ya Hamleya 15ê Tebaxe rê ameya abirnayîş. Raperîn Munzur nûşteyê xo yê bi sernameyê "Teorîya gula û Kurdistan" de na hamle sey agêrayîşê têkoşînê bîyayîş û azadîye yê şarê kurdî yê verba polîtîkayanê înkarî ercenena.

Dosyeya Şengalî

Rojname de sernameyo bîn o ke hîra ca gêno, Qirkerdişê Şengalî yo. Nûşteyê Sozdar Avesta de hêrişê DAIŞ’î yê 3ê Tebaxa 2014î yê vera komelê êzidîyan yenê ercnayîş û netîceyê nê qetlîamî ke tede taybetî cinî û domanî ameyî hedefkerdiş, yenê rakerdiş.

Aştîye û rîbirîameyîş

Nuşteyê Hacer Altunsoy yê "Qanûno kok û cesaretkerdişê aştîye" de çareserîya persa kurdî ser o vengajîyî yenê ercnayîş. Yeno vatene ke çareserîya persanê se serran bi dewamkerdişê polîtîkayanê şerî nê, bi rîbirîameyîşê heqîqetî û îradeyê çareserîya demokratîke mimkin a.

Pawitişo cewherî û Jineolojîye

Viyan Lolan nuşteyê xo "Pawitişo cewherî bi rêxistinbîyayîşî kulturkerdiş o" de pawitişê komelî ser o vindertena. Roza Metîna zî polîtîkayanê bêcezamanayîşî yê dewayanê kiştişê cinîyan anena ziwan. Dosyeya Jineolojîye ya Seval Balci de xebatê Şengal û Başûrê Kurdistanî yenê tehlîlkerdiş.

Kultur, edebîyat û têgêrayîşê cinîyan

Pela kulturî de nuştox Gulistan Kanîreş reyde yew roportaj ca gêno û girîngîya tarîxnuştişê cinîyan ser o yeno vindertiş. Pelanê portreyî de astronomê cinîyî yê Harvardî, hunermend Asmahan, têgêrayîşê cinîyan ê Hindistanî û rojnamegera fîlîpînij Frenchie Mae Cumpio yenê qalikerdiş.

Pela peyêne de notê rojnameyanê Berfin Nurhaka ke Garê de şehîd bîya, ca gênê. Hûmara Tebaxe ya Newaya Jinî newayajin.net ser o wanîyena.