Nêrazîbîyayîşê Bozarslanî yê vera nuştoxê Akitî yê seba Dîa Sabayî: “O domanê Amedî yo”
Serekê Cemîyetê Rojnamegeran ê Başûrê Rojhelatî û Endamê Heyetê Şêwirmendîye yê Amedsporî Felat Bozarslanî, vera rexneyanê ke serê nasnameyê futbolbazê Amedsporî Dîa Sabayî ra ameyê kerdene, nêrazîbîyayîşêko tûj ramot. Bozarslanî da zanayene ke Saba lajê keyeyêkê erebê muslumanî yo û va: “Ziwan, dîn, nîjad û nasnameyê ey qet ma eleqedar nêkeno.”
Serekê Cemîyetê Rojnamegeran ê Başûrê Rojhelatî Felat Bozarslanî, eşkerdayîşo ke hesabê xo yê medyaya sosyale ra kerd de, nêrazîbîyayîşê xo yê vera nuştoxê Akitî yo ke Dîa Saba rexne kerd, mojna.
Bozarslanî bale ante ser ke Saba lajê keyeyêkê erebê muslumanî yo û îfade kerd ke futbolbaz nê semedî ra ameyo vederkerdene. Bozarslanî pawît ke nê rexneyî tewirê vera Amedsporî dir elaqedar ê û nê vateyî xebitnayî: “La wexto ke mesele bena Amedspor şima şaş benê ke koti ra hêriş bikerê. Şima çend hêriş bikerê ma do hende pîl bibê. Nika ra pey na lîg de Amedspor esto û şima do zî naye rê bimusê.”
Bozarslanî veng da nuştoxê Akitî ke wa rojnamegerîye bikero û waşt ke serkewtişê Amedsporî bi hawayêko bêhet bêro qalkerdene. Bozarslanî dîqet ant wayîrvejîyayîşo ke Dîa Saba Amed de vîneno ser û eşkerdayîşê xo bi nê vateyan qedîna: “Ziwan, dîn, nîjad û nasnameyê Dîa Sabayî qet ma eleqedar nêkeno. Ereb bo zî, mûsewî bo zî, musluman bo zî, o canê ma yo û domanê Amedî yo.”
