Mustafa Karasu: Wexto ke azadîya Rayberîye bêra caardene, komplo do bi temamî bêro puçkerdene

Mustafa Karasuyî bernameyêkê taybetî yê Medya Haberî de averşîyayîşê Kurdîstan, Tirkîya û Rojhelatê Mîyanênî erjnayî. Karasuyî vat ke 9ê teşrîna verêne ya 1998î de bi komploya vera Rayber Apoyî waştêne ke Têgêrayîşê Azadîye bi temamî bêro tesfîyekerdene û komplo hetê Amerîka û Îsraîlî ra ameye kerdene.

Karasuyî vat: “Amancê komplo no bî ke bi hepisbîyayîşê Rayberîya ma, têgêrayîşê ma bêro tesfîyekerdene. La ma û şarê ma wayîrîya Rayberîya xo kerde. Komplo hetê amancanê xo ra puç bîye, la Rayber Apo hema hepis de yo; coka ganî têkoşînê vera komploye têkoşînê azadîya Rayber Apoyî bo.”

Karasuyî derheqê Prosesê Haştîye û Komelê Demokratîkî de vat ke ê sey têgêrayîşî gamê lazimî eştê, la dewleta tirkan hema zî israr kena: “Problemêko seserre bi qanûnanê kehenan, bi huqûqo kehen û fehmo sîyasî yo kehen çareser nêbeno. Ganî qanûnê azadîye vejîyê. Ganî Rayber Apo sey koordînatorê Heyetê Haştîye û Sîyasîbîyayîşî azad bixebitîyo.”

Karasuyî vat ke entegrasyono demokratîk demokratîkbîyayîşê Komar o û tena kurdan rê ney, seba elewîyan, cinîyan û karkeran zî lazim o: “Rojawanî de perwerdeyê bi ziwanê dayîke 3 saetî bo, nêbeno. Şarê kurdan qebul nêkeno û ma piştî danê tepşê înan.”

Karasuyî vat ke Amerîka Başûr ra bi temamî peyser nêşîyo, la îqtîdarê Başûrî seba ke demokratîk nîyo û piştîdayîşê şarî nêgêno, zeîf o: “Çîyo ke Başûrî xurt keno, hukmatêko demokratîk ê yewî yo ke îdareyê herêmkî ser o ronîyayo.” Karasuyî polîtîkaya îdaman a rejîmê Îranî zî rexne kerd û vat: “Îdam raştîya merdimîye ra teber o; ganî hêzê demokrasîye vera ci tepş bigîrê.”