Mûş de vera mergê şikdarî yê zîndanî cipêrsayîşo bitesîr ame waştene
Platformê Dezgehanê Demokratîkan ê Mûşî bi waştişê roşnkerdişê mergê şikdarî yê Ozcan Aksuyî ke zîndan de dinyaya xo bedilnaye, Meydanê Kobanê de eşkerayîye daye.
Eşkerayîye de ya ke pîya bi keyeyê Aksuyî dezgehê komelê sîvîlî û xeylê kesî tewrê ci bîyî, pankertê ‘’Seba Ozcan Aksuyî edalet. Heta wertevetişê heqîqetî û caardişê edaletî têkoşînê ma do dewam bikero’’ ame akerdene.
Hemeserekê DBPyî yê Mûşî Umut Yilmazî îfade kerd ke mergê Aksuyî şikdar o û vat ganî her hetî ra bêro cipersayene.
Welîka DEM Partî ya Mûşî Sumeyye Boz zî ard ziwan ke Aksuyî binê çimdarîya dewlete de dinyaya xo bedilnaye û waşt wa berpirsîyarî bêrê vînayene. Sumyye Boz vat, ‘’Dewlete berpirsîyara cuya Ozcanî bî’’ û waşt wa cipersayîşo hîra bêro kerdene.
Temsîlkara TUAYDERî Nurîye Arslantaş zî vat cenazaya Aksuyî de rêçê îşkence û derbî bibî û îfade kerd ke kesê ke yenê destbendkerde û tepiştene binê çimdarîya dewlete de yê û dewlete înan ra berpirsîyar a. Nurîye Arslantaş veng da ke binpaykerdişê heqanê zîndanan, îdîayê îşkence û mergê şikdarî wa cade bêrê cipersayene. Nurîye Arslantaş waşt wa wezîfadarê berpirsîyarî bêrê muhakemekerdene û heta caardişê edaletî prosesê mergê Aksuyî bêro teqîpkerdene.
