Munih de polîsan domano kurd bi çeke birîndar kerd
Munih de polîsan wendekaro kurd Abdulkadîr O. (14) bi çeke bi giranî birîndar kerd. Polîs vano înan destê Abdulkadîrî de çeko plastîk bibi, keyeyê ci nê red keno.
Şaristanê Schwabingî yê Munîhî de roja di sêşemeyî polîsan Abdulkadîr O. (14) seba ke destê ci çeka airsoft ke sey raştkînî eseno kiriştêne, gule na pa û birandar kerd. Polîsî îdîa kenê ke domanî pê çeke verê xo dayo înan la keyeyê ci vano bado ke polîsan hîşyar kerd Abdulkadîrî çeke plastîk cade eşt war û vat pê kay keno.
Operasyon de yo ke 80 polîsî tewrê ci bîyî, Abdulkadîr zereyê xo xo pê guleyî birîndar bi û rewşa ci stabîl a. Keyeyî vat ke bado ke Abdulkadîr pê guleyî ame pirodayene, polîsan o pilizna erdî ro û destê ci kelemçe kerdî û xebere nêdaye înan.
Ame vatene ke serebûte yena cipersayene ke polîs goreyê huqûqî têgêrayo ya nê û derheqê polîsê ke gule teqnayo de cipersayîş dîya destpêkerdene. Rayena derheqê Abdulkadîrî de zî seba ke yeno îdîakerdene ke polîsî tehdît kerdî cipersayîş dîya destpêkerdene. Keye û Merkezê Kulturê Kurdan ê Munihî wazeno ke serebûte her hetî ra bêro roşnkerdene.
