‘Mîrasê Elîşêr û Zarîfe rayîrê ma kenê roşn û hêz danê ma’
Partîya Herêmanê Demokratîkan (DBP) bi minasebetê serrgêra 89. ya qetilkerdişê înan, serkêşê kurdan Elîşêr û Zarîfe bi eşkerayîyêke vîr ardî û vat: “Wa çimê înan pey de nêmanê, mîraswerê înan têkoşînî xurtêr kenê.”
Partîya Herêmanê Demokratîkan (DBP) semedê serrgêra 89. ya qetilkerdişê rayberanê azadîye Elîşêr û Zarîfe, hesabê xo yê medyaya dîjîtale ra eşkerayîyêka vîrardişî pare kerde.
Eşkerayîye de nê ameyî vatiş:
“Di şervanê azadîye, di serkêşê têkoşînê bêhempayî Elîşêr û Zarîfe nê ra 89 serrî verî ameyî qetilkerdene. Her di kesayetî ke wayîrê hezkerdişê şarê xo û bawerîya cuya azade bîyî, tarîxê kurdan de mîrasêko domdare verada. Vîrardişê înan têna vîrardişê di kesan nîyo; vîrardişê têkoşînê estbîyayîşî û îradeyê cuya rûmetdare yo. Cesaret, qerardarî û fedakarîya înan hertim ma rê rayberîye kenê; rayîrê ma kenê roşn û hêzêko pîl danê ma.
Ma ewro înan têna nêanê xo vîr; eynî wext de vengdayîşê înan ê seba pawitişê ziwan, kultur, heqanê merdiman û aştîye yad kenê. Wa çimê înan pey de nêmanê, mîraswerê înan ewro têkoşînê înan hîna berz kenê û vera zulmkarîye bi şeklêko xurt xover danê. Ma verê vîrardişê Elîşêr û Zarîfe de sereyê xo tewnenê; înan bi rêzdarîye û hesrete anê vîrê xo.”
