Mezopotamya de Kongreyê Psîkolojîye: Ziwanê psîkolojîye çi vano?
Kongreyo ke hetê Komeleya Psîkologanê Mezopotamya ra yeno viraştene de, têkilîya psîkolojîye bi ziwan, nasname, ziwanê dayîke, koç, vîr û cînsîyetê komelkî yeno nîqaşkerdene. Pêvînayîş hîrê rojî dewam keno û 50 ra zêdêr qiseykerdoxî tede ca genê.
Komeleya Psîkologanê Mezopotamya, 25-27ê Êlule de Amed de seba nîqaşkerdişê psîkolojîye mîhwerê ziwan û nasnameyî de yew kongre virazena. Kongreyê Psîkolojîye yê Mezopotamya bi sernameyê “Merdim ganî psîkolojîya xo bi ziwan û nasnameyê xo hîs bikero” Merkezê Kongreyî yê Alî Emîrî yê qezaya Yenîşehîrî de yeno viraştene.
Endama desteya îdareyî ya komele psîkologe Laleşe Ongun vat ke babeta bingeyin a nê kongreyî tesîrê ziwan û nasnameyî yê serê psîkolojîye yo. Goreyê Ongune, tarîfkerdişê hestan û îfadekerdişê ters, şîn yan zî kêfweşîye, bi ziwanê merdimî ra nêzdî ra têkildar o. Coka qedexekerdişê yew ziwanî warê psîkolojîkî de zî şopan verdano û heta nika psîkolojîye nê tesîrî bi hawayêko kîfş nêgirewtê dest.
Kongre de heme herêmanê Kurdîstanî, dîyaspora û bajaranê cîya cîyayan ê Tirkîya ra 50 ra zêdêr qiseykerdoxî yenê têhet. Pêşkêşîyî do bi lehçeyanê kurdîye; kurmancî, soranî û kirmanckî reyde bi tirkî û îngîlîzkî bêrê viraştene.
Bername de înşakerdişê ziwan û nasnameyî, rola ziwanê dayîke ya awankerdişê nasnameyî, têkilîya koç û nasnameyî û psîkolojîya dudilîye ya ziwanê qedexekerdeyî (Rûmet û şerm) yenê nîqaşkerdene. Reyna “Cografyaya parçekerde de ziwan û nasname”, “Mekan, nasname û vîndîbîyayîş” û “Terapî û ziwanê dayîke” ser o roniştişî est ê. Hîrê rojan mîyan de atolyeyê cîya cîyayî sey terapîya hunerî, sosyodrama, EMDR û terapîya muzîkî zî yenê viraştene.
