Mehkeme waştişê tepiştişê leşkerî ke Durdu qetil kerdo, red kerd
Roniştişê dewaya Seyîthan Durduyê ke bi guleyê leşkeran ameyo qetilkerdene de, dozgerî waşt ke leşkeran ra Yîgîthan Adali bi sûcê "qesden kiştişê merdimî" bêro tepiştene. Mehkeme zî no waştiş red kerde.
Roniştişê 8. yê dewaya derheqê mergê Seyîthan Durduyî (40) ke 28ê Kanûne ya 2024î de taxa Avzêrke ya qezaya Seravî ya Wanî de netîceya adirê leşkeran de weşîya xo vîndî kerde, Mehkemeya Cezaya Girane ya 1. ya Wanî de ame dîyene. Serekê Baroyê Wanî Sînan Ozaraz, avûkatê Seyîthan Durduyî û avûkatê faîlan tewrê roniştişî bîyî.
Tesbîtê nasnameyî ra dima avûkatê keyeyê Durduyî Ozal Bedîrî qisey kerd. Bedîrî vat ke seba eşkerakerdişê raştîya hedîseyî tu hewldayîş çin o û wina vat: “Goreyê heme belgeyan hedîse teberê warê leşkerî de ameyo kerdene. Nexşeyê qedexeyê leşkerî ke leşkeran dayê û yê Midurîya Pêroyî ya Nexşe û Kadastroyî pê nêtepişênê. Seba ke heyetêko xoser reyna koordînatan kifş bikero, ganî rapora bîlîrkîşîyî bêra amadekerdene. Reyna qeydêko vengî ke dekerdîyo dosya de, tede qeydê heqaretî yê leşkerî yê bi şiklê ‘înan bîtepişê, belaya înan....’ esto. Reyna dîmenî estê ke nê kesî bi kameraya termale ameyê teqîbkerdene. Ganî bîlîrkîşîyo xoser derheqê dosya de reyna raporêk amade bikero. No nêro kerdene, raştîyê derheqê dosya de nêvejîyenê orte.”
Serekê Baroyê Wanî Sînan Ozarazî zî wina vat: “Yew muhakemekerdişo adil, tena pê munaqeşekerdiş û eşkerakerdişê bêkêmasî yê heme delîlan beno. Bêhetîya mehkemeyêke zî, resayîşê bêkêmanî yê raştîyan ê ke ganî dosya de bêrê cigêrayene yo. Ganî prensîbê huqûqî yê gerdûnî bêrê verçimangirewtene. Qeydê vengî eşkera qeydêko wina yo ke nê kesan keno hedef la sey delîlî nêame dekerdene dosya. Ganî no bêro ercnayene.”
‘Qesken kiştiş û waştişê tepiştişê lejkerî’
Pawitişan (mudafayan) ra dima meqamê îdîa, mutalaaya xo ya ke verê cû dabî vurnaye. Dozgero ke roniştişê verênî de vatbî leşkeran Durdu bêqest kişto û bi hinceta ke sûcê "bi teqsîr (bêqest) bîyîşê sebebê mergê merdimêkî" ameyo kerdene waştbî 2 serran ra heta 6 serran cezaya zîndanî bêro dayene, na rey waşt ke leşkeran ra Yîgîthan Adali rê bi sûcê “bi qesto muhtemel kiştişê merdimî" ceza bidîyo û bêro tepiştene.
Dima ra Serekê Baroyî Sînan Ozarazî qisey kerd û vat ke ganî Yîgîthan Adalîyo ke verê cû amebi tepiştene û bi hawayêkê bêhuqûqî amebi veradayene, reyna bêro tepiştene.
Heyetê mehkeme, qerarê redkerdişê waştişê tepiştişê Yîgîthan Adalîyî da û waşt ke qeydê îmajî reyna bêrê cigêrayîşkerdene û raporkerdene. Mehkeme roniştişo bîn taloqê 13ê teşrîna peyêne kerd.
