Mehbûbe Şabanî Zîndanê Wakîlabadî de grevê vêşanîye de ya
Mehbûbe Şabanî ke Îran de tepişteyanê çalakîyanê aşma Çeleyî ra yew a, seba ke şert û mercanê xiraban ê qismê karantîna yê Zîndanê Wakîlabadî yê Meşhedî û nedîyarîya dewaya xo protesto bikera, dest bi grevê vêşanîye kerda.
Goreyê xebaranê ke ameyê weşanayene, tepişteyanê sîyasîyan ê çalakîyanê Çeleyê 2026î ra Mehbûbe Şabanî dest bi grevê vêşanîye kerda. Ame vatiş ke Mehbûbe seba ke şert û mercanê xiraban ê zîndanan, qismê karantîna yê Zîndanê Wakîlabadî yê Meşhedî û nedîyarîya dewaya xo protesto bikera, qerarê çalakîye dayo.
Goreyê raporî, 4ê Temmuze de Mehbûbe Şabanî sey ceza ameya eştene bi karantîna û wextê neqilkerdişî (kiriştişî) de raştê şîdetî ameya. Heto bîn ra, şert û mercê xirabî yê karantîna bîyê sebeb ke tepişteya sîyasîye nêweşîya çermî bigêra. Mehbûbe Şabanî 3yê Sibata 2026î de Meşhed de ameye girewtene. Girewtişê ci ra dima, wextêko derg hucreyê kesêkî de menda û dima zî ameya şirawetene bi qismê cinîyan ê Zîndanê Wakîlabadî.
Goreyê îdîanameyî, Mehbûbe Şabanî rîyê ci ra yena sûcdarkerdene ke ê kesê ke nawnayîşanê 8, 9 û 10ê Çeleyî de birîndar bîyê, bi motorsîkletê xo berdê merkezanê weşîye. Heto bîn ra, îdîanameyê destpêkî de sûcê ‘moharebeh’î barijîyabi Mehbûbe Şabanî ser, la no sûc çend hewteyî verê cû îdîanameyê peyênî ra ame vetene.
