Meclîsê Şarê Şingalî: Qerarê Bexdadî yewhetî yo û şikbar o
Meclîsê Şarê Şingalî eşkera kerd ke kombîyayîşo ke vizêrî Bexdad de derheqê Şingalî de ame viraştene, bê temsîlkar û fikrê komelê êzîdîyan ameyo organîzekerdene û no zî bîyo sebebê endîşe û şikan.
Çend rojî yo ke derheqê Şingal, rewşa komelê êzîdîyan û statuyê qewetanê pawitişî de averşîyayîşê muhîmî yenê ciwîyayene. Vizêrî bi serekîya Serekê Ofîsê Serokwezîrîya Îraqî Bexdad de derheqê rewşa Şingalî de kombîyayîşêko muhîm ame viraştene. Ame dîyarkerdene ke kombîyayîşî de dezgehê îstîxbarat, asayîş û îdareyê Iraqî û Temsîlkarê Ofîsê Programê Averşîyayîşî yê Neteweyanê Yewbîyayeyan (UNDP) zî hazir bîyî û derheqê rewşa asayîş û îdarî ya Şingalî, agêrayîşê koçberanê êzîdîyan û tayê babetanê bînan ê muhîman de munaqeşeyê hîrayî ameyî kerdene.
Fermandarîya Yewînanê Xoverdayîşê Şingalî (YBŞ) zî bi eşkerayîyêka nuştekî îdîayê "beşdarbîyayîşê 2 hezar û 200 şervananê YBŞyî yê artêşa Iraqî" red kerdî û da zanayene ke seba serwerîya Iraq û menfeetê Şingalî amade yê ke muzakereyan Iraqî reyde aver berê.
Nê kombîyayîşî ra dima eşkerayî û hişyarîyan de Meclîsê Şarê Şingalî zî derheqê kombîyayîşê Bexdadî de eşkerayîyêka nuştekî weşanaye. Meclîsî hişyarî daye ke bê temsîlkaranê Şingalî derheqê ameyoxê herême de qerarê neweyî nêyenê girewtene û bale ante ke na rewşe komelê êzîdîyan mîyan de bîyo sebebê endîşe. Meclîsê Şarê Şingalî ard ziwan ke entegrasyono demokratîk rayîrê çareserîye yo tewr munasib o û venga hukmatê Iraqî da ke qewetanê pawitişî yê Şingalî yê sey YBŞ-YJŞyî û Asayîşê Êzîdxanî bi fermî nas bikero.
