Meclîsê Cinîyan ê Perî: Ma do vera talanê xoza bêveng menanê
Meclîsê Cinîyan ê Platformê Pawitişê Dormeyî yê Newala Perî verê Şaredarîya Kanîreşî de eşkerayîye daye û vat ê do vera talanê xoza têkoşînê xo bidomnê.
Qezaya Kanîreşî yê Çewlîgî de Meclîsê Cinîyan ê Platformê Pawitişê Dormeyî yê Newala Perî verê Şaredarîya Kanîreşî de eşkerayîye daye.
Nilufere Uyguna ke bi nameyê platformî qisey kerd û ard ziwan ke badê vejîyayîşê qanûnê bi humara 7554î hêrişê vera cuye û xoza zêdîyayî û vat no qanûn xizmetê menfeatê serdestan keno. Uygune serrgêra xoverdayîşê Daristanê Akbelenî ard vîrî û vat Gimgim, Kanîreş, Çermê, Newala Perî û xeylê herêman de şar seba pawitişê xozaya xo têkoşîn keno.
Uygune ard ziwan ke dormeyê Newela Perî bi projeyanê maden û enerjî ameyo girewtene û vat: ''Ma do destur medê ê seba menfeatê xo xozaya ma talan bikerê. Heqê şaristanî û têkoşîno ekolojîk yewbînan ra cîya nîyê. Ma do dewan, wareyan û daristananê xo de vera nê talanî bêveng memanê.''
Uygune derheqê muracatê betalkerdişî yê Mehmekeya Qanûnê Bingeyî de zî veng da ke wa qeraro ke heqanê şar û xoza esas geno, bêro girewtene. Uygune vat: ''Warê ma yê cuye yê rotişî nîyê. Xoza yê şîrketan ney, yê şarî ya. Şar û cinîyê ke xover danê, do ser bikewê.''
Eşkerayîye bi slogananê "Jin, jiyan, azadî" û "Destê xo awe, hewa û herra ma rê derg mekerê" qedîyaye.
