Mazlum Abdîyî eşkere kerd: Seba agêrayîşan pêkerdiş virazîya
Fermandarê Pêroyî yê HSD’yî Mazlum Abdî, heyetê hukmatê Sûrîyeyî yê bi serekîya Zîyad Ayîşî reyde pêvînayîşêk kerd. Pêvînayîş de asayîşê Hasekê, hêrişê vera dezgehan, agêrayîşê koçberan û tewrbîyayîşê HSD’yî yê Sûrîyeyî ameyî qiseykerdene.
Fermandarê Pêroyî yê HSD’yî Mazlum Abdî hesabê xo yê X’î ra eşkere kerd ke ey temsîlkarê Sûrîyeyî Zîyad Ayîş û Fermandarê Artêşa Sûrîyeyî Avad Casim qebul kerdî. Abdîyî dîyar kerd ke pêvînayîş rind bîyo û seba asayîşê Hasekê gamê şênberî ameyî eştene.
Agêrayîşî, raştê problemê asayîşî ameyî
No pêvînayîş wextêko wina de bî ke keyeyê kurdî rîyê asayîşî ra nêeşkayî agêrê Serêkanîyê. 10ê Tebaxe de 409 keyeyî rayir kewtî. Înan ra 50 keyeyê kurdî dima ke resayî şaristan, raştê hêrişan ameyî û agêrayî kampanê Hasekê.
Endamê Komîteya Koçberan Cîwan Îsoyî nê serebûtî rexne kerdî. Îsoyî vat ke heta ke asayîş nêro ronayene no hêriş nêerzîyeno qebulkerdene. Gorayê Îsoyî na rewş mojnena ke asayîş nêvirazîyayo û ganî hesabê hêrişan bêro perskerdene û bê asayîşî agêrayîş tehlûke yo.
