Mayê Şemeyî aqibetê Mustafa Mehmet Gunkanî persayî

Mayê Şemeyî hewteyê 1117. de reyna Meydanê Galatasarayî yê Stenbolî de ameyî têhet. Çalakîya nê hewteyî de aqibetê Mustafa Mehmet Gunkanî ame persayene ke 18ê Tebaxa 1994î de ame desbendkerdene û vînîkerdene.

Yasemîne Bektaşa ke eşkerayîye wende û vat “Gunkanî 1994 bado ke derheqê vengkerdişê dewan û îşkenceyê ke dîyî de zanayîş da rayapêroyî hetê leşkeran ra ame vengdayene ke şiro qeraqol û tîya ra pê helîkopterê leşkerî ame berdene. O tarîxî ra nata tira xebere nêameye girewtene. Rixmo ke 32 serrî vîyartî hema zî cipersayîşo bitesîr nêame kerdene.''

Lajê Gunkanî, Heybet Gunkanî zî mektbubê babîyê xo çalakîye de wend. Gunkanî waşt wa aqibetê babîyê ci bêro eşkerakerdene, berpirsîyarî bi tewirê bi tesîrî bêrê cipersayene û keyeyê ci bireso mezelê xo.

Bektaşe vat, ''Çend serrî vîyarenê wa ravîyarê; ma do seba Mustafa Mehmet Gunkan û heme vîndîkerdeyanê xo waştişê edaletî cameverdê.''