'Ma wazenê dîyalog û muzakere bikerê kulturêkê cuye'

Endamê Hereketê Azadîya Kurdistanî Nurettîn Demîrtaşî proses ser o qisey kerd û vat ke dîyalog û muzakere ke Prosesê Aştî û Komelê Demokratîkî de vejîyayî vernî, tena metodêkê çareserîya meseleyanê sîyasîyan nîyê, kulturêk o ke ganî heme waranê cuya komelkî de bêro berdene: "Dîyalog têkilîya mabênê merdiman tarîf keno; eke dîyalog çin bo, komelkî nêbena. Sîyaset de manaya ci xorînêr a, çunke têkilîya grûban tarîf keno ke hedefê înan cîya yê. Muzakere zî mîyanê dîyalogî de kombîyayîş babetêka taybetî û dîyayîşê nuqtaya hempare ser o ya. Ma wazenê muzakere bikerê kultur."

Nurettîn Demîrtaşî ard ziwan ke dîyalog û muzakere cehdê fehmkerdişê yewbînan ê kesan ê ke cîya, heta vera yewbînan fikirîyenê; bê nînan hemverîye nêyena wedarnayene û tim ver bi zemînê pêkewtişî şina: "Sîstemo kapîtalîst wazeno heme dinya bikero warê şerî û merkezê ci Rojhelatê Mîyanênî yo. Rayîro yewane yê vejîyayîşê nê kulturê şerî dîyalog û muzakere yo; nêke aqil û sîstemo ke şikitiş-şikîyayîş, merdiş-kiştişî ser o awan bîyo, qet çareserî nêano. Eke ma naye bikerê kulturêkê cuye yo domdar, herinda merdiş û kiştişî de bi qetî ciwîyayîş û ciwînayîş yeno. Dewlemendîyê ma yê komelkî û kulturî zaf ê; herinda parekerdişê înan de tim pêkewtiş kesî rê fayde nêano."

Demîrtaşî vat ke dîyalog û muzakere garantîya cuya merdimî yê; hetê bînî de kes nêzano kam key pêkewtiş vejeno, key kay û komployan keno: "Rojhelatê Mîyanênî de dîn, mezheb û heme nasnameyî bîyî sebebê pêkewtiş û şerî; metodo tewr tesîrdar ê peynîardişê ney dîyalog û muzakere yo. Bi yew peymane her çî nêqedîyeno; netîce wedarnayîşê bi temamî yê nakokîyan nîyo, la pêserameyîş hemsengîyêk de prensîbê muzakere yo û tena bi ney averşîyayîş mumkun o. Muzakere eynî wext de têkoşînêk o, la bê pêkewtiş û bê çinkerdişê yewbînan hurmet îfade keno. Ewro hema zî zaf beşî ziwanê pêkewtişî yê verênî de îsrar kenê; la kulturê dîyalog û muzakere prensîbêk o ke sebr û tehamulê ci mojneno û înan zî vurneno. Ma bi prensîbî nêzdî benê û ney nêverdanê."

Demîrtaşî peynî de vat: "Rayber Apo sey muzakerekaro sereke nê prosesî rameno. Sey komel zî naye esasgirewtiş, bi heme beşanê komelî reyde ziwanê dîyalog û muzakere averberdiş, nê ruhî ganî tepiştiş û ci kerdişê kultur, rayîro yewane yo ke ma ciwîneno û azad keno."