‘Ma do wayîrê mîrasê înan bivejîyê’
Vîrardîşanê ke seba kesanê ke têkoşînê azadîye de şehîd bîyî ameyî viraştene de, sozê wayîrvejîyayîşê têkoşînê înan ame dayene.
Seba şehîdanê têkoşînê azadîya kurdan, qezayanê Esenyurt û Sultangazîyê Stenbolî de programê vîrardîşî ameyî viraştene.
Esenyurt de, bînaya Rêxistina Qezaye ya DEM Partîye de vîrardîşo ke xeylêk kesî tewrê ci bîyî, bi rêzgirewtişî dest pêkerd. Dima ra sînevîzyonêk ame mojnayene. Vîrardîş de tim sloganê “Bijî Serok Apo” û “Şehîd namirin” ameyî eştene. Aktîvîsta TJA Sevgi Yilmaz qisey kerd û vat: “Derdekê ma pîl o, la sereyê ma berz o. Ma do wayîrê mîrasê înan bivejîyê.”
Keyeyanê şehîdan zî vat: “Ma bawerîya xo bi têkoşînê înan anê û do heta peynîye dima înan de bê. Pêvajoyê Aştî û Komelê Demokratîkî zî bi xêra înan ame caardene. Tek waştişê ma o yo ke her kes wayîrê ravêrî bivejîyo.”
Dima Hemsereka DEM Partîye ya Stenbolî Arife Çinar û Nevzat Ozturko ke 32 serrî ra dima zîndan ra vejîya, qisey kerd û serweşîye waşte. Vîrardîş bi duayan û sloganan qedîya.
SULTANGAZÎ
Bînaya DEM Partîye ya Sultangazî de zî xeylêk kesî tewrê vîrardîşî bîyî. Salona ke vîrardîş tede ame viraştene, bi renganê zer, sûr û keskî ameye xemilnayene. Salone rê fotografê Rayberê Şarê Kurdî Abdullah Ocalanî û pankartê “Şehîdên me rûmeta me ye” û “Şehîd namirin” ameyî aliqnayene.
Aktîvîsta TJA’yî Sebahat Tuncel qisey kerd û vat: “Ciwanê ma seba şarêkê ke ziwan û nasnameyê ci qedexekerde yo, têkoşîn kenê. Kapîtalîzm ma rê ameyoxêk vaad nêkeno. Ganî ma dima înan de nêbermê, alayanê înan hîna aver berê. Seba nê ganî ma hîna zaf têkoşîn bikerê.”
Murat Arslano ke 31 serrî ra dima tehlîye bi, wina vat: “Domnayîşê têkoşînê înan deynê ma yo. Ma çiqas wayîr bivejîyê û kêmanîyanê xo temam bikerê, o qas înan rê layîq benê.”
Vîrardîş dima ra bi mojnayîşê sînevîzyonî peynî bî.
