"Ma do waştişê azadîya fîzîkî ya Abdullah Ocalanî ra game peyser nêerzê "

Serkêşîya Têgêrayîşê Cinîyan ê Azadan (TJA) de Salona Konferansan a Tahîr Elçî ya Baroya Amedî de kombîyayîşêkê çapemenî ame viraştene. Temsîlkerdoxê cinîyan ê rêxistin û dezgehanê komelê sîvîlî tewrê kombîyayîşî bîyî. Salone de pankartê "Nika wextê cinîyan o" ame dardekerdene.

Aktîvîsta TJA Ayla Akat Ata metnê çapemenî wend û vat: "Ewro cografyaya ma û Rojhelato Mîyanên demêko newe de yê. Çareserîya demokratîke ya meseleya kurdan bîya teqezîyêk ke nêyena taloqkerdene. Ganî qanûnê çarçewa zî îdîaya gama verêne ya nê demî bikirêşo. Qanûnê çarçewa peynî nîyo; ganî bibo destpêkê demê neweyî ke esasanê çareserîya demokratîke û huqûqê haştîye dîyar keno."

Ata vat: "Sey TJA ma zanê ke haştîya menda tena bi awankerdişê cuyêk mumkin a ke azadîya cinîyan esas gêna. Berpirsîyarîya ma ya bingeyêne hewanayîşê astengê huqûqî û sîyasî yê vernîya heme cinîyan û girewtişê cuya seypêye, azade û rêxistinkerde ya cinî, şar û heme beşanê komelî binê temînatî ya."

Ata vat ganî stratejîya haştîye û perspektîfê azadîya cinîyan ke Birêz Abdullah Ocalanî aver berdo, bêrê çiman ver: "Resayîşê Birêz Ocalanî yê şertanê xebate û têkilîye yê azadan û temînkerdişê azadîya ci ya fîzîkî hetê averşîyayîşê prosesî ra muhîm ê. Ganî temînatê huqûqî yê nê rolî qanûnê çarçewa de cewabê xo yo şênber bivîno."

Ata vat ganî qanûno ke do bêro vetene dûrîyê cîyayîyanê kategorîkan û tam bo: "Herinda nêzdîbîyayîşanê teng û asayîşesasan de ganî taybetmendîyêka ronayoxe bibo ke heme dînamîkanê komelî verare keno, bawerî û edaletî awan keno."

Ata vat dewlete û Meclis mukelef ê ke heme komîsyonan de temsîlîyetê seypê yê cinîyan temîn bikerê û beşdarbîyayîşê sîyasetî yê cinîyanê ke prosesanê agêrayîş û entegrasyonî de yê, girê bidê temînatê huqûqî ra. Ata vat: "Ma qerardar ê ke mekanîzmayanê xoseran ê cinîyan awan bikerê, rêxistinanê cinîyan bikerê elemanê eslî yê prosesî û vera astengan têkoşîn bidê. Cinî do bibê hêzo pêşeng ê komelkîbîyayîşê haştîye."

Badê eşkerayîye ame vîyartene kursîya azade; cinîyanê temsîlkerdoxan ê rêxistinanê komelê sîvîlî û odeyanê meslekî uca de qisey kerd.