‘Ma do ravêrî bikerê têkoşînê hamperî yê komelî’

Meclîsê Partî yê DBP’yî netîcenameyê kombîyayîşê xo yê Wanî de averşîyayîşê Rojhelatê Mîyanênî, Ravêrê Aştîye û Komelê Demokratîkî û xebatê partî erjnayî.

Netîcename de ame vatene ke pêkewtişê ke Rojhelatê Mîyanênî de qewimîyenê feydeyê seba şarî ra zafêr netîceyê têkoşînê hegemonya yê hêzanê globalî yê û ame îfade kerdene ke çareserîya demokratîke bi îradeyê hemparî yê şaran û modelê komelê dmeokratîkî mumkun a, yewîya ke Rojhilat de mabênê hêzanê kurdan de ameye pêardene ameye paştdayene û hêriş û zextê Îranî yê vera kurdan de ameyî şermezarkerdene.

Netîcename de ame vatene ke seba ke Ravêrê Aştîye û Komelê Demokratîkî bibo mende gerek statuyê Rayberê Şarê Kurdî Abdullah Ocalanî bêro naskerdene û azadîya ci bêro caardene, qanûnê çarçewe bêro vetene û gamê huqûqî yê ke verê sîyasetê demokratîkî akenê bêrê eştene.

Ame dîyarkerdiş ke cinîyî hêzo ronayox ê komelê demokratîkî yê û ame îfadekerdene ke sîstemê hemserekîye û prensîbê temsîlkarîya seypêyî do bêrê pawitene. Bale ameye antene polîtîkayanê şerê taybetî yê vera ciwanan û cinîyan ser û ame vatene bi narkotîk, şîdet û helisnayîşê komelkî yeno waştene ke komelo rêxistinkerde bêro zehîfkerdene.

DBP’yî vat ê do rojanê verê ma de xebatanê perwerdeyê xorî bikerê, ravêrê kongre temam bikerê û têhetameyîşanê ''Ma Şarî Reyde Qala Aştîye Kenê'' bidomnê û wina ame vatene: ''Wezîfeyo tarîxî ke verê ma de yo; rêxsitinîya partî girdêr bikerê, sîyasetê demokratîkî xurtêr bikerê, rêxistinîya cinî û ciwanan aver berê û Ravêrê Aştîye û Komelê Demokratîkî bikerê têkoşînê hamperî yê komelî.''