‘Ma azadîya fîzîkî ya Rayber Apoyî ser o kilît bîyî’

Merkezê Têkilîya Çapemenî yê HPG’yî serrgêra 42. ya Hemleya 15ê Tebaxe pîroz kerde û vat: "Wa Roşanê Gandarbîyayîşî yê Neteweyî sere de rayber û mîmarê nê vejîyayîşê tarîxî Rayber Apo, keyeyanê şehîdanê ma, şarê ma yo welatperwer û heme dostanê ma rê pîroz bo."

Eşkerayîye de ame vatene ke Hemleya 15ê Tebaxe yê şertan de qewimîya ke ziwan, nasname û estbîyayîşê kurdan ameyêne înkarkerdene û Kurdîstan bi temamî binê îşxalî de bî: "Vejîyayîşê tarîxî yê Rayber Apoyî, awankerdişê PKK’yî, veşnayîşê adirê xoverdayîşî yê Mazlûm Doganî Zîndanê Amedî de bi hîrê kibrîtan û xoverdayîşê Çaran û yê 14ê Temmuze bingeyê Hemleya 15ê Tebaxa 1984î viraşt. Bi 'Guleyê Verênî' ke serkêşîya Mahsûm Korkmazî de ame erzayene, şerê estbîyayîş û azadîye dest pêkerd û no seba kurdan bî mîlad."

HPG’yî wina vat: "Hemleya 15ê Tebaxe tena çalakîyêka leşkerî nîya; destkewtişêko tarîxî yo yê şarêk ke resabî gama çinbîyayîşî. Na hemle her çîyî ra ver vejîyayîşêk bî vera zincîranê koletîye yê zîhnê kurdî. Karakolê ke kolonyalîzmî sereyê merdimê kurdî de awan kerdbî, dayî erdî ro û mojna ke kurd û Kurdîstan heqîqet o ke nêyeno înkarkerdene. Şorişê Gandarbîyayîşî cayê ke kurdî tede yê de prosesêko şorişgerî aver berd. Cinîya kurde ya azade ya ke bi nê şorişî wirzîye pay, ewro bîya pêşenga cuya azade ya ke heme cinîyê dinya ci ra îlham gênê. Gerîla tu wext tena şervanêko asayî nêbî; seba kurdan bî îfadeyê merdimê kurdî yo newe û azad. Gerîla bi meziyetanê xo yê merdimane, feragatê xo yo gird, girêdayîşê xo yo welat û şarî û îradeyê xo yê nêşikitbar zerrîya şarê ma de text viraşt. Meşaleya ke bi Hemleya 15ê Tebaxe ame veşnayene, komel ferdgirîye, bêçareyî û bêhereketîye ra xelisna û exlaqêko komelkî yo fedakar awan kerd."

Eşkerayîye wina dewam kerd: "Merkezê heme nê averşîyayîşan de bêguman Rayber Apo est o. Ewro heqîqetêk o ke heme dinya zana: azadîya Rayber Apoyî seba şar û Têgêrayîşê ma eslê xo de muhîm o. Ewro heme dînamîkê Têkoşînê Azadîye azadîya fîzîkî ya Rayber Apoyî ser o kilît bîyê. Heme cigêrayîş û nêzdîbîyayîşê ke vindertiş û azadîya mutlaqe ya Rayber Apoyî esas nêgênê, gerîlayan het de bêhukm ê. Sey gerîlayanê azadîye ma bale ancenê ser o ke heta ke Rayber Apo bireso azadîya xo ya fîzîkî, xoverdayîşê ma bi her rayîr û metodî do bê qutbîyayîş û bi qerardarî dewam bikero."

Eşkerayîye wina qedîyaye: "Bi na hêvî, bawerî û qerardarîya serkewtişî ma reyna Roşanê Gandarbîyayîşî pîroz kenê û soz danê ke ma do rayîrşîyayîşê xo yê 'Rayberîya Azade, Kurdîstanêko Azad' teqez berê serkewtişî."