London de meseleya kurdan û ravêrê aştîye konferansê mîyanneteweyî de qisey benê

Konferanso ke hetê Centre for Kurdish Affairsî ra Hamilton House de yeno viraştene, sîyasetmedar, akademîsyen, rojnameger û temsîlkaranê komelê sîvîlî yê kurdan û pisporanê ke ravêranê aştîye yê welatanê cîyayan de ca girewto, ano pêser. Wezîrê Teberî yo verên û Hetkarê Serokwezîrî yê Îngilîstanî David Lammy û wekîlê Partîya Karkeran Catherine West û Bambos Charalambous piştîdayîşê xo yê amancanê konferansî eşkera kerd.

Roja verêne ravêrê aştîye yê Îrlandaya Vakurî, Kolombîya, Afrîkaya Başûrî, Welatê Baskî, Katalonya û Tîrolê Başûrî yenê qiseykerdene; sernameyê sey muzakere û dîyalogê sîyasî, vîyartişê pêkewtişê çekdarî ra sîyasetê demokratîkî, bêçekbîyayîş, entegrasyono newe, parekerdişê selahîyetî, otonomî û garantîyê destûrî bi tecrubeyanê welatanê cîyayan yenê munaqeşekerdene. Victoria Sandino ke ravêrê aştîye yê Kolombîya de ca girewto, bi mesajê vîdeoyî beşdar bena.

30ê Êlule de roniştişî raşteraşt hetanê sîyasî, huqûqî, komelkî û herêmkîyan ê meseleya kurdan rê yenê cîyakerdene: ameyoxê sîyasetê kurdan, temsîlê demokratîk, îdareyê herêmkî, rolê komelê sîvîlî û dîyaspora û tesîrê averşîyayîşanê Tirkîya, Sûrîye, Iraq û Îranî yê kurdan ser o; bê nînan rolê cinîyan ê ravêranê aştîye, beşdarîya kêmînan, heqê merdiman, azadîya çapemenîye û pêkerdişê komelkî zî program de yê. Qiseykerdoxanê konferansî ra Pervîne Buldan, Gultane Kişanak, Gulustane Kiliç Koçyîgît, Serpîle Kemalbay û Osman Baydemîr est ê.

Koordînatora Centre for Kurdish Affairsî Nejla Ari vat ke amancê konferansî têhetardişê tecrubeyanê aştîye yê welatanê cîyayan û tecrubeyanê sîyasî yê kurdan ê eynî platformî de yo; qedînayîşê pêkewtişê çekdarî, dewamkerdişê dîyalogê sîyasî û rêzkerdişê qanûnî yê bêçekbîyayîş û entegrasyonî seba çareserîyêka mende sernameyê muhîmî yê. Persa bingeyine ya konferansî na ya: "Ravêrê dûrîkewtişê pêkewtişê çekdarî ra senî beno çareserîyêka sîyasî ya mende, demokratîke û tesîrdare?"