Le Monde: Tazîyayê ke seba gerîlayan yenê viraştene, nîşaneyê prosesê neweyî yê
Rojnameyê fransizan Le Mondeyî, yadkerdişê şehîdan warê pêroyî de yenê viraştene, sey nîşaneyanê Prosesê Haştî û Komelê Demokratîkî yê warê komelkî ra yew erjna.
Le Monde xeberêka hîraye weşanaye ke tede tazîya û yadkerdişê şehîdanê gerîlayanê PKKyî yê Kurdîstan û Tirkîya ca gênê.
Roportajê bi îmzaya Céline Pierre-Magnanî de ame dîyarkerdene ke badê ke PKKyî 21ê tebaxe ra nat melumatê nasnameyê nizdîyê 100 gerîlayanê şehîdan şarî reyde par kerdî, sere de Amed, Wan û Îstanbul de keyeyan dest bi qebulkerdişê serweşîyan kerd.
Le Mondeyî îşaret kerd ke tazîyayî tena hetêk nîyê ke keyeyî badê serran halê merdimanê xo musenê, sewbîna hetêk ê ke tesîrê prosesî yê warê komelkî mojnenê.
Rojnameyî de seba tazîyaya Hakan Sasikî yê Arnavutkoyê Îstanbulî cayêko hîra ame dayene. Ame îfadekerdene ke Sasik 2014î de tewrê PKKyî bîbî, keyeyê ci nizdîyê 12 serran xebere ci ra nêgirewtbî û tena bi lîsteya ke ame eşkerakerdene musayî ke o 6ê teşrîna verêne 2020î de cuya xo ra bîyo.
Le Monde bale ante fotografê gerîlayan û posteranê Rayber Apoyî yê warê tazîyayan ser o û vat ke heta çend serrî verê cû mumkin nêbî ke nê dîmenî Tirkîya de bi eşkerayî bêrê mojnayene: hîrê serrî verê cû selahîyetdaranê tirkan dîmenêko wina tehemul nêkerdêne.
Le Mondeyî, tazîyayê ke ewro bi eşkerayî yenê viraştene, girê da atmosferê sîyasî yê prosesî ra ke peynîya 2024î de dest pêkerd û bi vengdayîşê Rayber Apoyî vîyart merhelayêka newîye.
Rojnameyî bi vatişanê keyeyan bale ante netîceya merdimane ya pêkewtişan ke bi desserran o dewam kenê, ser o û vat ke tazîyayî êdî tena yadkerdiş nîyê; bîyê warê ke tede netîceyê demê pêkewtişî yê keyeyan û komelê kurdî ser o benê asaye.
Le Mondeyî, tazîyayî mîyanê munaqeşeyanê sîyasî yê demê neweyî de erjnayî û bale ante ser o ke vîyartişê têkoşînê çekdarî ra têkoşînê sîyasî yê demokratîkî bingeyê demêko newe viraşto. Roportajî de erjnayîşê Nedîm Yilmazî ke 33 serrî zîndan de mendo û eşkerayîyê Hemserekê Pêroyî yê DEM Partî Tuncer Bakirhanî zî ca girewtî.
Le Monde vat hedefanê bingeyînan ê demê neweyî ra yew dewamkerdişê têkoşînê heqanê seypêyan zemînê qanûnî û sîyasetê demokratîkî yo, la bale ante ser o ke halê dewleta huqûqî û azadîyanê bingeyînan ê Tirkîya de, no vurîyayîş do ser bikewo yan nê, persanê bingeyînan ê demê ameyoxî ra yew o.
Rojnameyê fransizan erjnayîşê xo yê 11ê tebaxe de zî vatbî ke qanûnê çarçewa tena bi xo meseleya kurdan çareser nêkeno; bi girsîye verdayîşê çekan û prosesanê huqûqî gêno xo dest, la waştişê sîyasî yê kurdan û halê Rayber Apoyî bêçareser mendî.
