Konvoyê Amedsporî rê cezaya pereyan ame birnayene
Qezaya Solhanî de badê maçê Amedsporî konvoyêkê şayîye ame viraştene û kesê ke tewrê konvoyî bîyî, înan rê cezaya pereyan ame dayene. Welatîyan nêrazîbîyayîşê xo yê vera nê cezayan ard ziwan û vat: “Nê cezayî şexsê Amedsporî û nasnameyê ey rê ameyî dayene.”
Vizêrî şan, badê ke Amedsporî Beşîktaş 3-2 bin vist, sey zaf şaristan û qezayan qezaya Solhana Çewlîgî de zî şayîyî ameyî kerdene. Kesê ke tewrê konvoyî bîyî, înan ra heme ney, la zafê înan rê seba “vengo zêde” cezaya 7 hezar TLyî ame birnayene.
Welatîyanê ke derheqê na babete de qisey kerd, dîyar kerd ke nê cezayî şexsê Amedsporî û nasnameyê ey rê ameyî dayene. Înan vat ke tîmê bînî zî konvoyan virazenê û veng zêde beno, la înan rê ceza nêyena dayene; nê cezayî tena Amedsporî rê yenê dayene.
Welatî vanê ke na cezayêka sîyasî ya û wazenê ke nê cezayî bêrê wedaritene.
Nameyê welatîyanê ke ceza girewta û resayê destê ma, nê yê: Mesut Kopuk, Serkan Yapici, Veysî Arî, Abdullah Boltan, Remzîye Oylek, Fatma Îlhan.
