Konferansê vurîyayîşê Demokratîkî yê Komare: Wextê temaşekerdişê ravêrî nîyo
Serekê Weqfa Aştîye Hakan Tahmazî Konferansê "Vurîyayîşê Komare" de qisey kerd û vat: “Eke ma do komarêka neweye awan bikerê, ganî ma felsefeya awanbîyayîşê komara yewine ra peyser biewniyê. Karê ma zehmet o, wextê temaşekerdişê ravêrî nîyo. Eke ma goreyê hewceyîya sîyasetî nê, bi hişmendîya hemwelatîbîyayîşî ravêrî aver berê, ma do wayîrê hêzê tesîrî bibê.”
Konferansê "Seserra Diyîne de Vurîyayîşê Demokratîkî yê Komare û Komelî" yo ke hetê Komeleya Dikanê Sosyolojî, Foruma Aştîye ya Îzmîrî, Foruma Rêxistinanê Cwanan (GOFOR) û 27 vengdayoxan ra ameyo organîzekerdiş, Baroyê Îzmîrî de yeno viraştiş. Konferans bi qiseykerdişê akerdişî yê Sosyolog Ferhat Kentel û Avqat Turkan Aslan Agaç dest pêkerd û bi roniştişê "Seserra 1. ra heta Seserra 2. Dewamkerdişê Otorîterî yê Komare û 12ê Êlule" dewam kerd.
Moderatorê roniştişî Akın Birdalî vat: "Bêvengbîyayîşê çekan ra teber, bê demokratîkbîyayîşî nêbeno." Birdalî ard ziwan ke sedsala yewine de bê rîbirîbîyayîşî, rîbirîbîyayîşê sedsala diyîne zehmet o û vat: “Tarîxêko qisurdar yê 103 serran yê Tirkîya esto.”
‘Ganî pratîkêko demokratîk bêro caardene’
Dima Prof. Aslıhan Aykaç qisey kerd û bi nimûneyanê Tirkîya û Şîlî bale ante ser ke derbeya 12ê Êlule astengêka pîla ya verê demokratîkbîyayîşî ya. Aykaçe vat: “Rastîya ci de berzbîyayîşê sîyasetê populîstî û rejimê yew-merdimî têna xweserê Tirkîya nîyê, xirabîyêka ruhê wextî ya. Ganî têna sîyaset de nê, warê ekonomî û komelî de zî rêxistinbîyayîş bibo û pratîkêko demokratîk her ca de bêro caardene.”
3 unsurê demokratîkbîyayîşî
Dima Prof. Funda Barbarose bi daneyan bale ante rewşa ekonomîye û bêedaletîya debarî ser. Barbarose vat: “Polîtîkayanê neolîberalan nêtena merdiman rê, xozayî rê zî huzur nêard. Demokratîkbîyayîş nê 3 unsuran ra cîya nêeşkeno bêro fikirîyayîş.”
Hakan Tahmazî reyna bale ante Ravêrê Komelê Demokratîkî û Aştîye ser û vat: “22 aşmî yo ravêr asê mendo. Çareserkerdişê rîçikê meseleya kurdan û demokratîkbîyayîşê komare de, ma do firsendê ameyo afernayîş senî bixebitnê? Eke cuye tewr erjaya pîroz a, cuye ra qîmetêr çi eşkeno bibo? Ganî ma aştîye bipawê û qîmetê ci bizanê.”
Akademîsyen Levent Kokerî demê 1923-1960î zey wesayetê Kemalîstî pênase kerd û vat: "Rejîmo ewroyên halê peyên yê rejîmê Kemalîstî yê ke bi 12ê Êlule ameyo modîfîyekerdiş o. Seba vînayîşê rejîmêko zextkarêr hewce bi kahîntîye çîyo." Etnîk û bawerîyanê cîya cîyayan rê înkar ameyo kerdene, Kokerî vat: "Ewro ma vînenê ke bi 12ê Êlule dewlete rê pozîsyonêko serê sinifan ameyo dayîş."
Konferans, bi 3 roniştişanê bînan yê cîya cîyayan ke serê xeta "Hêzê Herêmî", "Ciwanî û Aştî" û "Vengê Cîyayî" de yê, dewam keno.
