Konferansê Şaristanî yê DEM Partî yê Wanî: ganî ma keye bi keye, taxe bi taxe rêxistin bibê
Hemserekê Şaristanî Veysî Dilekçîyî ke Konferansê 5. yê Rêxistina Şaristanî ya Wanî ya DEM Partî de qisey kerd, ard ziwan ke seba awankerdişê komelê demokratîkî do têkoşînê rêxistinkerdeyî gird bikerê û vengdayîşê gamanê huqûqîyan ame kerdene.
Rêxistina Şaristanî ya Wanî ya DEM Partî Kombîyayîşê Konferansê 5. yê Girdî awanîya Baroya Wanî de kerd. Konferanso ke temsîlkarê partîyanê sîyasîyan û rêxistinanê girseyî yê demokratîkan tede ca girewt, bi şîarê "Seba Komara Demokratîke komelêko azad û rêxistinkerde" ame kerdene.
Hemserekê Şaristanî yê Wanî yê DEM Partî Veysî Dilekçîyî akerdişî de êyê ke Qirkerdişê Pirsûsî de ganê xo ra bîyî, yad kerdî û ard ziwan ke Prosesê Haştî û Komelê Demokratîkî yê ke Rayber Apoyî 27ê sibate ya 2025î de dest pêkerd, seba demokratîkbîyayîşê Tirkîya muhîm o.
Dilekçîyî ard ziwan ke naskerdişê nasnameyê kurdan û kurdkî sernameyanê bingeyînan ê prosesî ra yew o û vat ke ganî dewlete derheqê serebûdanê vîyarteyî de gamanê huqûqî bierzo û rîbirî bibo.
Dilekçîyî ard ziwan ke seba awankerdişê komelê demokratîkî rêxistinbîyayîşêko pêtêr hewce yo û tekîd kerd ke wezîfeyê muhîmî kewenê înan ser o ke sîyasetê demokratîkî ramenê: "Ganî ma keye bi keye, taxe bi taxe xebate bikê û rêxistin bikerê. Na mana de kar zaf keweno înan ser o ke sîyasetê demokratîkî ramenê. Ganî ma bilezabez komelî bivurnê û bikerê komelêko ke xo rê bes o."
Dilekçîyî vat ke ê heta nika polîtîkayanê zordarî, şîdet û qirkerdişî reyde rî bi rî mendî, la do têkoşînê sîyasetê demokratîkî dewam bikerê.
Konferans badê qiseykerdişanê akerdişî bi roniştişanê ke çapemenî rê girewte bîyî, dewam kerd.
