Konferansê KNK’yî: Kurdî warê Neteweyanê Yewbîyayeyan de temsîlîyet û statu wazenê

Konferanso ke bi waştişê wa kurdî warê Neteweyanê Yewbîyayeyan (NY) de bibê wayîrê statuyî û temsîlîyetî bi vengdayîşê Kongreya Neteweyî ya Kurdîstanî (KNK) ame organîzekerdene, paytextê Belçîka Bruksel dest pê kerd. Çar hetanê Kurdîstanî û welatanê cîya cîyayan ê dinya ra temsîlkarê partîyanê sîyasîyan û dezgehan, akademîsyen û pîsporê huqûqî yê mîyanneteweyî tewrê konferansî bîyî. Konferans de xebatê dîplomatîkî yê ke bi waştişê 60 mîlyon kurdî wa warê mîyanneteweyî de bi nasname û îradeyê xo bêrê temslîkerdene do bêro rayraberdene, yenê destgirewtene.

Konferans bi wendişê marşê Ey Reqîbî û rêzgirewtişî dest pê kerd. Dima ra dîwan ame vîjnayene. Fehmî Vergîlî, Nîlufer Koç ve Wîrya Qaradaxî dîwanî rê ameyî vîjnayene.

Hemsereka KNK’yî Zeyneb Murade ke qalkerdişê akerdişî yê konferansî kerd, vat nizdê serrêke yo xebata dîplomatîke yena rayraberdene û partîyanê sîyasîyan û dezgehanê Kurdîstanî reyde pêvînayîşî yenê kerdene. Murade îfafe kerd ke rixmo ke 60 mîlyon kesî cografyaya xo de bi nasname û kulturê xo ciwîyenê dezgehanê mîyanneteweyî de temsîlîyetê înan çîn o û vat ke konferans de na mesele do bêro munaqeşekerdene.

Hemserekê KNK’yî Ahmet Karamusî zî konferans hetê têkoşînê şarê kurdî ra sey rojêka tarîxî name kerd û vat: ''Pêro kurdî wazenê ke çar parçeyan de bibê wayîrê statuyî û warê Neteweyanê Yewbîyayeyan de bêrê temsîlkerdene. Bedilnayîşanê Rojhelatê Mîyanênî û Kurdîstanî îmkan û rîskê neweyî afirnayî. Nê ravêrî de ganî yewîye û tewiro neteweyî yo hempar ê mabênê kurdan ganî bêro averberdene.''

Karamusî da zanayene ke çarçewaya muracatê NY’yî waranê cîya cîyayan de temasî ameyî kerdene, pîya bi Rojawan, Vakur, Başûr û Ewropa, Silêmanî, Qendîl û Hewlêr de zî temsîlkaranê partîyanê sîyasîyan û dezgehan reyde pêvînayîşî ameyî viraştene û hol vîyartî ra û vat ke seba pîya têgêrayîşî zemînêk ameyo pêardene û temasî do dewam bikerê.