KON-MED’î veng da ke 10ê teşrîna verêne de beşdarîya çalakîyanê panc şaristanan bibo

KON-MED’î derheqê serrgêra komployî de eşkerayîyêka nuştekî daye. Eşkerayîye de wina ame vatene: “9ê teşrîna verêne ya 1998î, destpêkê merheleyêka newîye û tayînkere ya komployê mîyanneteweyî yo ke vera pêşengê têkoşînê azadîya şarê kurdî Abdullah Ocalanî ame amadekerdene.”

KON-MED’î dîyar kerd ke ravêr bi mecburkerdişê Rayberê Şarê Kurdî Abdullah Ocalanî ra dest pêkerd ke Sûrîye ra vejîyo. Goreyê KON-MED’î, ravêr 15ê Sibate ya 1999î de dewam kerd: “Rayber Apo Kenya de ame tepiştene û berdîya Tirkîya. Naye ra dima meseleya kurdan bîye problemêko tarîxî ke tena Tirkîya ney, hêzê mîyanneteweyî zî rasterast dekewtî mîyan.” KON-MED’î vat: “28 serrî vîyartî zî, raştîyê ke 9ê teşrîna verêne vetî meydan, hema zî hewanênîyayê.”

KON-MED’î bale ante ke aştî tena bêvengbîyayîşê çekan nîya û vat: “Aştî, a ya ke şarê kurdî derheqê ameyoxê xo de bi azadîye wayîrê vatişî bo.” 

KON-MED’î dîyar kerd ke aştî tena bi awankerdişê hawayêkê raştikênî yê dîyalog û muzakereyî mumkun a û azadîya Rayberê Şarê Kurdî Abdullah Ocalanî kilîtê çareserîya demokratîk a.

KON-MED’î vat: “Waştişê azadîye û cuya demokratîke yê şarê kurdî waştişêko wina nîyo ke merdim bieşko peyser game bifîno.” 

KON-MED’î dîyar kerd ke komelê kurdan û embazê înan ê Almanya do şaristananê cîyayan de çalakî û aktîvîteyan bikerê ke manaya tarîxîye ya 9ê teşrîna verêne raya pêroyî reyde pare bikerê û çareserîya demokratîke ya meseleya kurdan munaqeşe bikerê. 

Eşkerayîye de wina ame vatene: “Ma veng danê şarê kurdî û heme kesanê ke demokrasî, heqanê însanan û haştî ra hetkar ê, ke 10ê teşrîna verêne ya 2026î de Duesseldorf, Berlîn, Hamburg, Frankfurt û Bremen de bi xurtîye beşdarîya çalakî û aktîvîteyan bikerê û têkoşînî berz bikerê.”