Koma C31K'î reyna rojev de ya: Amadekarîya hêrişê wendegehan kerdênê

Vera rêxistina sûcî ya bi nameyê C31K’î ke amadekarîya hêrişê çekdarî kerdêne, operasyon ame kerdene. Heqê 32 kesan de ke 19ê înan domanê ke suqê sûcî bîyê qerarê destbendkerdişî ame dayene. 27 kesî ameyî destbendkerdene û 5 kesî zî yenê geyrayene.

Goreyê eşkerayîya Serekdozgerîya Enqereyî; ame qeydkerdene ke kesê ke heqê înan de qerarê destbendkerdişî dîyayo, medyaya komelkîye û tayê qenalanê medyaya dîtijale de muhtewayê sûcan pare kerdê. Operasyonanê hemwextan ê 22 şaristanan ê merkezê Enqereyî de, heqê 32 kesan de qerar ame dayene û heta nika 27 kesî ameyî tepiştene.

Eşkerayîya Serekdozgerîya Komare ya Enqereyî de wina ame vatene: 

"Çarçewaya tehqîqatê Serekdozgerîya Komare ya Enqereyî de, vera rêxistina sûcî ya bi nameyê C31K’î ke platformanê medyaya sanale û têkilîye de parekerdişê muhtewayê cîya-cîyayê sûcan kerdêne û amadekarîya hêrişanê çekdaran yê vera 3 wendegehanê 3 şaristanan de pare kerdêne, 22 şaristanan ê merkezê Enqereyî de operasyonê hemwextî ameyî viraştene. Heqê 32 şikdaran de ke 19ê înan domanê ke suqê sûcî bîyê qerarê destbendkerdişî ame dayene û 27 şikdarî ameyî tepiştene."

Hêrişê wendegehî yê Meraşî ra dima ameybî rojev

Yeno zanayene ke koma bi nameyê C31K’î eslê xo de sey platformêko medyaya komelkîye (taybetî Telegram de) ameya ronayene. Nameyo ke înan şuxilnayo, manaya 'Qato 31. yê Cehenemî' dano. Averajê serranê endamanê kome zêdêrî mabênê 14-16 de yo.

Koma ke verê cû bi sûcdarkerdîşanê zey ezîyetkerdişê heywananê kuçeyî, parekerdişanê vera merdimanê mexdûran ê dewaya Mattia Ahmet Minguzzîyî, cinayetê cinîyan, îstîsmarê domanan de parekerdişê dîmenan û gefwerdişê komanê mexdûran ameybî rojev; hêrişê çekdarî yê Îsa Aras Mersinliyî yê vera wendegehê xo yê Meraşî ra dima reyna ameybî rojev.

Wezaretê Karanê Zereyî eşkera kerdbî ke parekerdişanê dima yê hêrişê Meraşî ra pey heqê kome de tehqîqat dîyayo destpêkerdene.