KNK’î serrgêra Şoreşê Rojawanî fîraz kerd
Konseya Rayberî ya Kongreya Neteweyî ya Kurdîstanî (KNK), serrgêra 14. ya Şoreşê Rojawanê Kurdîstanî fîraz kerde û wina vat: "KNK pêro kurd û kurdîstanijan ra wazeno ke seba pawitiş û ciwîyayîşê Îdareyê Xoserî yê Rojawanî, paştgirîyêka xurte bimojnê ra."
KNK bi wesîleya serrgêra 14. eşkerayîyêka nuştekîye vila kerde.
Eşkerayîya KNK'î wina ya:
"19ê Temmuza 2012î de Kobanî ra vengê şoreşî berz bi, vilikê Şoreşê Rojawanê Kurdîstanî tewq da û roje bi roje geş bi. Rojawanê Kurdîstanî zaf wext bi ke xo şoreşî rê amade kerdêne. Dêrik, Qamişlo, Amûdê, Serêkanîyê, Kobanî û Efrîn de şarî xo amade kerd ke wayîrê qeder û îradeyê xo vejîyo. Nê 14 serran de kurd û kurdîstanijan bi bedelanê giranan ravêrê xoserîye dewam kerd û de facto xoserîyêka demokratîke awan kerde.
Serrê ra dagirkerê Kurdîstanî na rewşa newîye ra nêrazî bîyî. Bi taybetî Tirkîya tim hêriş kerd. Kobanî kerd hedef û çeteyê DAIŞ’î rîyê ci ser o veradayî. Kobanî bi xoverdayîşêko destanwarî xo pawit. Dewleta tirke xoverdayîşê Kobanî de bin kewte, na rey Efrîn kerd hedef, dagir kerd û demografîyaya ci bedilnaye. Dima Serêkanîyê û Girê Spî dagir kerdî. Ewro zî bi dron û çekanê giranîyan hêrişê herême kena û qetlîaman kena. La xoverdayîşê şarê Rojawanê Kurdîstanî bi xurtî dewam keno.
Nika Sûrîye de rewşêka newîye esta. Serra vîyarte de rejîmê Baasî rijîya û Şam kewt destê hêzanê îslamîyan. Hêzanê girêdayeyanê dewleta tirke zî hêrişê Şehba, Heleb û Minbicî kerd. Îdareyê Xoserî vera nê hêrişan xo pawit. Dima Şam û hemkaranê ci hêrişê Reqa û Dêrazorî kerd. Hêzanê pawitişî yê Rojawanî (YPG-YPJ) her cephe de xover da û xeta kurdan pawite. Netîce de 29.01.2026 de bi îdareyê Şamî reyde peymanêk ameye îmzekerdene.
Nê têkoşînê şoreşgêrî yê Rojawanê Kurdîstanî de, ganî rola cinîyan nêra vîrî kerdene; rola cinîyan verê cepheyî de ya û zaf tesîrdar a. La Sûrîye de rewşe bi temamî aloz a. Îdareyê Şamî verî hêrişê elewîyan kerd û komkujîyî kerdî, dima durzî û xirîstîyanî kerdî hedef, peyra zî hêrişê kurdan kerd. Nika bi Şamî reyde şer vindarnayîşêk esto la xalê peymana 29ê Çeleyî nêameyê zelalkerdene. Îdareyê Şamî zelalkerdene de wayîrê helwestêka negatîf a. Na rewşêka xeter a û ganî ma pêro kurdîstanijî hişyar bibê. Ganî ma verî bi rayîrê dîyalogî çareserî bigêrê la pawitişê xo zî xurt bikê. Pawitişê Îdareyê Xoserî, pawitişê Kurdîstanî yo.
Bi na wesîleya serrgêra 14. ya Şoreşê Rojawanî, ma şarê Kurdîstanî û pêro îdareyê sîyasî û leşkerî pîroz kenê. KNK wazeno ke seba pawitişê Îdareyê Xoserî yê Rojawanî, welatî û axa ci, herkes tewr berz de paştgirîya şarê Rojawanê Kurdîstanî bikero. Şoreşa demokratîke, neteweyî û nîştimanî ya Rojawanê Kurdîstanî serkewte û serfîraz ba!
Biciwo xoverdayîş û serkewtişê Şoreşa Rojawanî!"
